Uumasut amiinik atisaliat takoqqusaarutigeqqunngilaat

Illersuiniaqatigiiffiup isumaqatissarsiornermi ataqatigiissaarisua Thorbjørn Schiønning inerteqqutigilersitsiniarneq pillugu avammut nalunaaruteqartuuvoq.

Ammit atorlugit tunisassiorneq pissuserissaarnermut naapertutinnginnerarpaa.

- Uumasut suugaluartullunniit uumasuutigalugit kinguaassiortinneqartarnerat annertuunik ajornartorsiortitsisarput, Thorbjørn Schiønning oqarpoq.

Norgep illoqarfiisa pingaarnersaanni Oslomi siorna atisanik takutitsinermi atisanik amminik takutsitsisoqannginnissaa atuutsinneqarpoq, nunarsuarmi atisanik takutitsisarnerni siullermeertumik amminik inerteqquteqartoqarluni.

Norgemi terianniaateqarfinni minkiuteqarfinnilu naalliutitsisoqartarnerata paasineqarnerata kingorna Norgemi inerteqquteqarnissamik aalajangerneq pivoq. Københavnimi atisanik takutitsisoqarnerani inerteqqutaalernissaa uumasunik illersuiniaqatigiiffimmit Anima-mit kaammattuutigineqarpoq.

Atisanik ammminik takutitsinermi atisat teriannianit minkinillu pisut takutinneqarput.

Uumasut nujuartat ungalulinni iniliani mattunneqartarput, ajornartorsiuteqarpassuarnik kinguneqartartunik.

Uumasut uippakajaalertarput annilaangalertarlutik, inilianilu kaajalukaartarput periuseq ataaseq atorlugu. Uumasut imminnut kimmartarnermikkut aamma ikeqalersarput.

Atisanik takutitsinermi uumasunit atisalianik inerteqquteqarnissamik kajumissaarinermi, puisit amiinit atisaliat aamma ilanngunneqarput, Thorbjørn Schiønning erseqqissaavoq.

- Puisit piniarneqarneranni allaaneqartut ilaat toqunneqarneq ajorput, ikilerneqartarput ipillutillu, Thorbjørn Shiønning suleqatitsinnit Martine Lind Krebsimit apersorneqarluni oqarpoq.

Uumasut amiinik atisaliornermi suugaluartuni, ajornartorsiuteqartuaannassaaq, ajoraluartumillu puisit amii aamma uani pineqartut oqaatigaa.

Københavnimi atisanik takutitsinermi puisit amiinik takutitsisoqarnissaa qularutissaanngilaq.

Københavnimi atisanik takutsitsinermut Københavns Modeuge-mut tapiisut pingaarnersaat Kopenhagen Fur atisanik amernik niuertarfik, atisanik saqqummersitsinissami atisanik ilusilersukkamminnik takutitsiniarput.

Københavnimi atisanik takutitsinermi Købehavns Modeuge-mi pisortap Eva Krusep Norgemiut aalajangernerat isornartorsiorpaa, oqarluni uumasut uumasuuneranni ajunngitsunik atugassaqartinneqarnissaat pingaaruteqarnerusoq, aviisi Poliken allaaserisaqarpoq.

Københavnimi atisanik takutitsinermi Købehavns Modeuge-mi pisortaq Eva Kruse pisoq pillugu oqaaseqartinniaraluaratsigu iluatsinngilarput.