Qunusaarisartut tassaanerupput uumasunik pinngortitamillu illersuineqatigiinni ilaasortat, taakkualu periusaat sorraatsumik pissussilersortut oqaatigineqarluni.
Puisit piaraannik piniartarnerannik akerliusut suliniaqatigiiffiannit EU-imi inatsisartuni ilaasortaqatigisara pulaartoqarnikuuvoq, taannalu oqaluttuarpoq, suliniaqatigiiffimmi ilaasortaq qunusaarisimasoq, puisinniartarnerup taasissutigineqarnissaannut akerliunngippat, namminerminut qinersisartuinullu kinguneqarnerlukkumaartoq, Johannes Lebeck Radikal Venstre sinnerlugit EU-imi inatsisartunut ilaasortaq oqarpoq.
Taamatuttaaq oqaluttuarpoq Venstre sinnerlugit EU-mi ilaasortaq Niels Busk.
- Suliniaqatigiiffiit inussiarnisaarlutik aallartittarput, tamatuma kingorna EU-imi inatsisartuni ilaasortat isummaminnit allaanerusunik isumaqartut paasigunikkit, pissusaat allanngortarlutik. Qunusaarilertarput inatsisartuni ilaasortanut inuttut kinguneqarnerlukkumaartoq oqartarlutik, erseqqissarnaguli qanoq kinguneqarnerlukkumaarnersoq, Niels Busk oqarpoq.
- Uumasunik pinngortitamillu illersuiniaqatigiit ataatsimeeqatigineqareernerisigut, qarasaasiakkut allagarsisaqattaartarpugut, inatsisartuni ilaasortaq atia taallugu eqqartortarlugu allakkatigullu aviisinut EU-milu ilaasortaqataannut nassiussortarlugit, Niels Busk oqarpoq, tamannalu pinerliiniat pissusaattut assersuullugu.
Pinngortitamik Avatangiisinillu illersuiniaqatigiiit Greenspeace uumasunillu illersuiniaqatigiit WSPA qunusaariisoqartarsimaneq pillugu oqarneq akerlilerpaat.
- Qunusaarinertut paasineqarsinnaasunik saqqummiussinissarput takorloorsinnaanngilarput, aamma takorlooruminaatsippara sulliniaqatigiiffiit qunusaarisinnaanerat, taamaaliorunimmi imminnut aaginnassapput, Gitte Buchhave uumasunik illersuiniaqatigiiffiup WSPA-p Danmarkimi immikkoortortaqarfiani pisortaq aviisimut Fyens Stiftidende-mut taamatut oqarpoq.