Uumasunik illersuiniat marluk tigusaapput

Sikuiuitsumi Kujallermi arferit pillugit sorsuunnertut ittumik pisoqartoq aviisi Politiken allaaserinnippoq. Akerleriit tassaallutik uumasunik illersuiniaqatigiit Sea Shepherd aamma Japanimiut arfanniat. Uumasunik illersuiniat ilaat marluk arfanniat umiarsuaanni tigusaaqqapput, Sea Shepherdip umiarsuaata naalagaata maanna Japanimiut arfanniutaata ikkivigalugu saassunneqarnissaa qunusaarutigaa.
Allattoq Mads Lynge
januaarip 17-at 2008 11:53

Imaq akerleriiffiusoq Sikuiuitsup eqqaani nunat tamat imartaannik taaneqartartumi, Australiap imartamisut pigerusutaani pivoq. Ippassaanikkunni Australiami eqqartuussivik aalajangiivoq, immami tamaani arfanniarneq inerteqqutaassasoq, tamannalu uumasunik illersuiniartut marluk Japanimiunut apuunniarsimagaluarpaat. Taama iliuuseqarneq videoliarineqarsimavoq, tassanilu takuneqarsinnaavoq angutit taakkua marluk umiarsuaq arfanniut ikkivigigaat, ikiniariartulli Japanimiut arfanniutaata inuttaanit tigusarineqartut.

Uumasunik illersuiniaqatigiit oqaatigaat uumasunik illersuiniat taakku marluk tigusarineqaramik, umiarsuarmut eqqunneqannginnerminni napparummut qilersuunneqartut imermillu nillertumik seqqittarneqarlutik.

Uumasunik illersuiniaqatigiit Japanimiut imaanik ujajaaniatut unnerluutigaat, tassa illersuiniat taakku marluk umiatsiaannut gummibådimut ikiteqqinngimmatigik.

Tamatuma akerlianik Japanimiut pisortat illersuiniat taakku marluk ujajaaniatut nalilerpaat, oqarlutik nunat tamat imartaanni qaaqquneqarani umiarsuarmut ikiinnarneq inerteqqutaasoq. Uumasunik illersuiniaqatigiit tigusatik iperassagunikkik piumasaraat uumasunik illersuiniaqatigiit umiarsuaat arfanniat umiarsuaannit 10 sømilinik ungasissuseqassasoq, tamannali illersuiniaqatigiit akueriumanngilaat.

Uumasunik illersuiniaqatigiit umiarsuaanni naalakkap Paul Watsonip, suliniaqatigiiffimmik sakkortusaartartutut ilisimaneqartumik aallartitsisuusup, Japanimiut umiarsuaata ikkivigineqarnissaa qunusaarutigaa.

Australiamiut nunanut allanut ministeriata akunnermiliuttuunissani maanna neqeroorutigaa, tassa Australiamiut umiarsuaannik aallartitserusuppoq, uumasunillu illersuiniat taakku marluk aarusullugit. Matumanili umiarsuit pineqartut marluusut naalagaasa akuersinissaat pisariaqarpoq, maannali akuersiumanersut suli nnalunarallarpoq.

Japanimiut apriliutinnagu 900-nik tikaagullinnik tikaagulliusaanillu 50-inik pisaqarusupput, arfanniarnertillu ilisimatusarnertut taallugu.

Nunat arlallit uumasunillu illersuiniaqatigiit ilisimatusaatigalugu arfanniarnermik oqalunneq nunat tamat imartaanni arfanniarnissamut utoqqatsissutaannaanerarpaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq