Uumasunik illersuiniaqatigiit WSAP: "Arferit kalaallillu nunaat ikiorsigit!"

Allattoq Jaaku Lyberth
apriilip 19-at 2007 16:54

“Arferit Kalaallillu Nunaat ikiorsigik” aningaasarsiutigalugu arfanniartalernissamut akerliuniarluni paasisitsiniaaneq taama qulequtaqarpoq.

Tamanna nunatsinnik atornerluineruvoq, Folketingimi

Atlantikup Avannaani Suleqatigiit isumaqarput.

Taamaattoqanngilaq, uumasunik illersuiniaqatigiinnit WSPA-mit paasisitsiniaasunit oqartoqarpoq.

Aningaasarsiutigalugu arfanniartarneq atuutilerseqqinneqassanersoq Arfanniarneq pillugu Ataatsimiititaliarsuup qaammatip tulliani aalajangiiffigissavaa. Danmarki akerliulluni taasisariaqartoq uumasunik illersuiniaqatigiiffik WSPA isumaqarpoq. Taamaattumik paasisitsiniaallutik aallartissimapput; oqarlutik aningaasarsiutigalugu arfanniartarneq Nunatta soqutigisaannut akerliusoq. WSPA-mit tunngavilersuutigineqarpoq, ullumikkut Nunatsinnut arfattassiissutigineqartartut nunatsinni inuit oqaluttuarisaanikkut kulturikkullu arfanniarnermik ingerlassaqarnerat aallaavigalugu aalajangersarneqartartut. Aningaasarsiutigalugu arfanniartoqartalerpat Nunarput immikkut isiginiarneqarunnaassaaq nunatsinnullu arfattassiissutigineqartartut ikilisinneqangaatsiassasut suliniaqatigiiffimmit oqaatigineqarpoq.

- Tamanna Nunatsinnik najummatserfiginninniarneruvoq atornerluiniarnerullunilu, Folketingimi Atlantikup avannaani Suleqatigiit taama isumaqarput ammasumillu allagaqarnermikkut paasisitsiniaaneq akuerisinnaanagu nalunaarutigalugu.

“Kulturerput aallaavigalugu inuiattut immikkukajaaq ittutut isigineqarluta nersussuarnik illernartuutitanik immikkut akuerineqarluta toqoraarusunngilagut”, suleqatigiit allakkaminni allapput, erseqqissarlugulu aningaasarsiutigalugu arfanniartalernissaq isumaqatigigamikku, pisassiissutaasartut ikinnerulissagaluarpataluunniit. “Taamaaliornikkut piniartarnerput nalinginnaasumik tunisassiornertut isigineqalissagaluarpoq, inuiattut immikkut pineqartussatut isigineqarunnaarluta”, taama allapput.

WSPA-p Danmarkimi tusagassiinermut pisortaata Lasse Bruunip paasisitsiniaanertik Nunatsinnik atornerluinertut isigineqarmat ajuusaarutigaa, tamannami siunertarinngikkaluaratsigu, oqarpoq.

- Ajuusaarnarpoq kalaallinut isiginninnerput ima nipeqalersinniarneqarmat, kalaallit tassaasut piniarnerinnarmik inuussutillit. Tassami Kalaallit Nunaat inuiaqatigiittut nutaaliaasutut isigaarput, arferillu neqaa kalaallit nalinginnaasumik nerisartagaattut isigaarput, soorlu Danmarkimi nersussuartortarlutalu puulukitortartugut. Taamaattumik ajuusaarutigaarput kulturikkut immikkukajaaq isiginnittutut oqaatiginiarneqarnerput. Siunertarisarput tassaaginnarpoq arferit qanoq illersorniarnerivut, tamatumunngalu atatillugu allanik ikiuinissamut periarfissaqarnersugut.

Paasisitsiniaatinnata Kuupik Kleist aamma Lars-Emil Johansen isumasiorniarlugit saaffigisimagaluarpavut qisuariarfigineqaratali, Lasse Bruun oqarpoq.