Uumasunik illersuiniaqatigiit qipoqqartassat pillugit kamapput

Danmark, Kalaallit Nunaat, USAlu qipoqqarnik piniarsinnaalernissamik tarraqqutseriarlutik pisassinneqarnissaminnut avatangiisinik uumasunillu illersuiniaqatigiinnit pasillerneqarput.
juunip 26-at 2009 14:44

Arfattassanik aalajangiisartup IWCp siulittaasuata amerikkamiuusup William Hogarthip kalaallit qipoqqarnik qulinik pisaqarsinnaanermut qinnuteqaataat ullumi Madeirami ataatsimiinnermi taasissutigitinngitsoorpaa. Taarsiullugu ukioq naalerpat apeqqut taannarpiaq kisimiitillugu oqallitigitinniarlugu aalajangerpoq.

- Akileraartartut aningaasartuuteqarnerunissaanik kinguneqaannassasoq, IWCllu aalajangiisarneranut tamat oqartussaaqataanerannik sumiginnaanerussasoq, arferit illersorneqarnissaannut suliniuteqartut kattuffianni ilaasortap Nicolas Entrupip tusagassiutitigut nalunaaruteqarnermini nalilerpaa.

Kalaallit qulinik qipoqqartassinneqarnissaat IWCp Ilisimatusarnermi Komitéanit taperserneqaraluarpoq, qipoqqaat navianartorsiortinneqanngimmata.