Uumasunik Illersuiniaqatigiit Kalaallit Nunaat atornerluppaat
Uumasunik Illersuiniaqatigiit Kattuffissuisa Kalaallit Nunaat atornerluppaat. Taama isumaqarput Folketingimi Atlantikup avannaani suliniaqatigiit.
Nunarsuarmiut peqatigiiffissuisa uumasunik illersuiniaqatigiiffissuat ”WSPA” uumasunik illersuiniaqatigiiffiit kattuffissui allat peqatigalugit Kalaallit Nunaanni iluanaarniutigalugu arfanniartitsisarneq akerlilersorpaat.
Iluanaarniutigalugu arfanniartitsisarnermik malittarisassat atuuttut Kalaallit Nunaanni malitarisassani atuuttuniit sakkortunerupput, taamaattumik Kalaallit Nunaannut arferit pisassiissutigineqartartut ikinnerulersinneqar-tariaqarput, iluanaarniutigalugu arfanniartitsisarneq Kalaallit Nunaannut eqqunneqassappat. Uumasunik illersuiniaqatigiifffiit Kattuffissui internetikkut nittartagaliorsimapput, iluanaarniutigalugu arfanniartarneq pillugu atsiortoqarsinnaalluni atsioraannilu Kalaallit Nunaannut tapersersuisoqarsinnaalluni.
Kisiannili taamaaliortitsineq ikiuiniartuusaarnermik Kalaallit Nunaannullu atornerluinermik isumaqarpoq, Atlantikup Avannaani suleqatigiit allakkaminni taama allagaqarput.
”Raajarniartarnitsitut qaleralinniartarnitsitullu iluanaarniutigalugu arfanniartarusunneruvugut, kulturerput aallavigalugu inuiattut allaassuteqartutut isigineqarnissatinninngarniit, nersussuarnimmi illernartuutitanik toqoraasutut isigineqarusunngilagut, uumasunik illersuiniaqatigiinniit pakkusimaneqartuusaarluta”, Atlantikup Avannaani suleqatigiit, Folketingip Avatangiiseqarnermut Pilersaarusiortarnermullu Ataatsimiititaliaanut allapput. Atlantip Avannaani suleqatigiit tassaapput; Lars-Emil Johansen, Høgni Høydal aamma Sofia Rossen.
