Uumasunik illersuiniaqatigiit Canadamiut aalisagartaannik mattusseqqusipput
Uumasunik illersuiniaqatigiiffiup oqaaseqartartua Mark Glover tugassiortunik katersortitsinermi ippasaq pisumi oqarpoq, puisinit pisunit EU-imut eqqusseqqussiunnaarneq Canada-miut aalisagartaanik eqqusseqqussiunnaarnissamik malitseqartariaqartoq, puisinit pisunit Canadamiut tunisassiornerat unitsivinneqassappat.
Tusagassiortunik katersortitsisoqarnerani Canadamiut ukiormanna puisinniarnerat videoliarineqarsimasoq aattaqaqisoq takutinneqarpoq.
Uumasunik illersuiniaqatigiiffiup periuseq taanna USA-mi misilippaat, neriniartarfiillu arlallit aalisakkanik Canadameersunik pisiumajunnaaraluartut, aalisakkanik piseqqusinani paasisitsiniaaneq iluatsissimmanngitsoq, aalisakkat pillugit ilisimatooq John Sackton oqarpoq, taamaattorli EU-mi Canadamiut aalisagartaannik piseqqusiunnaarnissamik paasisitsiniaanerup iluatsinnisaa John Sacktonip naatsorsuutigineruvaa.
Europami pisuut amerlasuut puisit toqorarneqartarnerannik akerliusut Canadamiut aalisagartaannik pisiumajunnaarnissminnut piumassuseqarnerussasut, John Sacktonip naatsorsuutigaa.
Canadami aalisarnermut ministereqarfimmi oqaaseqartittagaq, Scott Cantin oqarpoq, uumasunik illersuiniaqatigiit eqqunngitsunik pasilliutinillu aallaaveqartunik isumassarsiornerarlugit. Canadamiut aalisagartaanik EU pisisartut annersaasa tulleraat, siorna Canadamiut aalisagartaannik EU 500 millione koruunit nalinginik pisivoq.
