Uumasunik illersuiniaq Nuummi paasisassarsiorpoq

Pisiniarfiit neriniartarfiillu arferup neqaanik tuniniaanerat, Hardy Jonesip oqarnera naapertorlugu, IWC-p maleruaqqusaanik unioqqutitsineruvoq.

Cafe Esmeraldami nerisassat sassaalliutaasussat nalunaarsornerat taamaammat assilivaa. Tassani arferup neqaanik akulimmik sushiliortoqartarpoq.

- Arferit kalaallinit pisarineqartut nunap inuiisa nerisassaattut minneruleraluttuinnartumik naatsorsuutaapput. Tikaagulliusaap tikaagulliullu neqaat pisiniarfinni neriniartarfinnilu akisoorujussuanngorlugit tuniniagaapput. Taamaammat kalaallit arfanniartarnerat aningaasarsiupilunniarnermik tunngaveqarpoq nunallu inuiisa pisinnaatitaaffiinut attuumassuteqarnani. Kalaallimmi arferup neqaanik pissarsisinnaarpianngillat aningaasaatillit iluanaarutiginiarlugu neqi tamakkerlugu pisiarisarmassuk, Bluevoice.org-imi taama allappoq.

Hardy Jones ICC-p ataatsimeersuarnerani tusarnaajutigaluni Twitterimiittarpoq ippassarlu avatangiisit pillugit oqallittoqarmat ima allalluni:

- FN-ip akoorutissat pillugit ilisimasalittaata miluumasuni imarmiuni akoorutissat toqunartut navianartorsiortitsinerarlugit ICC-mi ataatsimeersuaqataasut oqaluttuukkaluarpai, taakkuli puisip amianik eqqusseqqusinnginneq soqutigineruaat, ilaatigut taama allappoq.

Hardy Jones CBS-imi tusagassiortutut sulisimavoq aallakaatitassiaalu arlallit National Geographicimi Discoverimilu takutinneqartarput.