Uumasunik illersuiniaq IWC-mut oqaatiginninniarpoq
Nuummi neriniartarfinniit pingasuniit kalaalimineerniartarfimmiillu assit IWC-mut nassiuneqassapput. Taakkua uumasunik illersuiniap Hardy Jonesip, ICC-p Nuummi ataatsimeersuarnerani malinnaasup, assilisarai.
- Arferup neqaanik Nuummi ersiinnartumik tuniniaaneq IWC-p malittarisassaanik unioqqutitsineruvoq, bluevoice.org-imi pisortaq oqarpoq.
Taassuma assilisani nittartakkamini saqqummiuttarpai, aammalu avatangiisinik illersuiniaqatigiinnut allanut nassiussuunniarlugit. Taava uppernarsaatit allat ilanngullugit, assiutini IWC-mut aamma nassiutissavai.
Inuit arfanniartuisa pisatik nunaminni tuninianngikkunik, suna inuussutigissagamikku?
- Apeqqut taanna akisinnaangilara. Oqaluttuutiinnarsinnaavakkit IWC arfattassiigami erseqqissunik malittarisassiorsimasoq. Malittarisassat unioqqutinneqarput, 69-inik ukiulik Hardy Jones Floridameersoq oqarpoq.
Taassuma timimi kviksølveqalersimanera napparsimassutigaa aaammigullu kræfterluni.
Nittartakkamik Bluevoice.org-imik pilersitsinermigut, nerisassat imaaneersut akuutissanik mingutsinneqarnerat pillugu paasisitsiniaavoq.
- Akuutissat aalisakkatigut immamilu miluumasutigut inuit arfiminertortartut peqqissusaannut ajoqusiisarnerat oqaluttuariniarlugu nittartakkamini allaaserinnittarluni Hardy Jones oqarpoq.
Taanna aamma Japamini aarluarsunniarnermik unitsitsiniaqataasimavoq.