Uuliasiulertoqarnissaanut Sisimiuni innuttaasut oqallitsinneqarput

Qeqertarsuup avataani uuliasiorluni qillerineq aasaru aallartippat, imermik ikummatissamillu uuliasiortunut pilersuineq Sisimiuniit ingerlanneqassaaq. Uuliamik nassaartoqaraluarpat 2020-ip missaani qalluisoqalersinnaavoq, Nunaoil taama ilimasaarivoq.

Uuliasiorluni qillerinerit Qeqertarsuup avataani aasaru ingerlanneqalerpata illoqarfinnut ataasiakkaanut suliassaqarnikkut sunniutissai ippassaq unnukkut innuttaasunut paasissutissiissutigineqarput.

- Imermik pilersuinissaq paasivarput Sisimiuninngaanniit aallaaveqassasoq. Aamma umiarsuit assartuutit ikummatissaat aamma maanngaanniit isumagissapput, Hans Henrik Olsen, Qeqqani Inuutissarsiornermut Siunnersuisoqatigiit pisortaat oqarpoq.

Uuliamik nassaartoqassagaluarpat ukiullu arlallit ingerlareerpata qalluisoqalissappat sunniutissai sorpassuupput. Angallannikkut aaqqissuussineq naleqqussarneqassaaq aamma uuliasiortitseqatigiiffimmut kiffartuussineq annertooq aallartinneqartussaassaaq, sullivinnik nunatsinni pilersitsiortortoqarsinnaalissalluni.

- Suli pisariaqartipparput erseqqinnerusumik sorpiaat eqqartorneqarnersut paasissallugit, taamaammat piffissaq tulleq tigussaanerusunik paasiniaassaagut, Hans Henrik Olsen nangippoq.

Uuliamik nassaartoqarneraniit qalluilernissamut allaat ukiut 20-t angullugit ingerlaqqaarsinnaasartut ippassaq saqqummiisut oqaatigaat. Nunatsinnili sivikinnerulaarsinnaasoq oqaatigineqarpoq.

- Naatsorsuutigineqarpoq taamatut nassaarnerminngaanniit qalluiviliorneq ukiut tallimat, arfineq marluk, arfineq pingasut ingerlaneranni naammassineqarsinnaasoq. Nassaartoqassagaluarpat, soorlu ilimagisinnaavarput immaqa 2020-mi taamatut qalluineq aallartinneqarsinnaasoq, Hans Kristian Olsen, Uuliasiortitseqatigiiffimmi Nunaoilimi pisortaq oqarpoq.

Uuliamik qalluisoqalissagaluarpat nunatta kiffartuussinikkut allarpassuartigullu sullissinikkut piareersarluarsimanissaa qitiusumillu inissisimaffeqarfinnissaa Hans Kristian Olsenip aamma pingaaruteqartoq oqaatigaa.

Hans Henrik Olsen, Qeqqani Inuutissarsiornermut Siunnersuisoqatigiit pisortaat isumaqarpoq siunissaq eqqarsaatigalugu Sisimiut umiarsualiveqarfiata sulianik maannakkornit annernik suliaqarfissatut tulluussartariaqartoq.

Uuliamik qalluiviliorneq 25-niit 30 milliarder koruunit tikillugit akeqassangatinneqarpoq ukiullu 30-iniit 40-inut atasinnaassangatinneqarluni, minnerunngitsumilli imminut akilersinnaasussaavoq.

- Akilersinnaassappat uuliaqarfik annertoorujussuaq, soorlu nappartanik 500 millioninik annertussuseqartoq imaluunniit annertunerusoq nassaarisariaqarpoq, Hans Kristian Olsen oqarpoq.

Taamaammat aamma pingaartippaat innuttaasut akornanni uuliasiulernissamut tunngasut oqallisigilluarneqarnissat.

Ilanngutassiaq unnugu Qanoruumi takuneqarsinnaavoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat