Uuliasiulernissarsuaq pillugu piareersaleruttorput
Uuliasiulernissarsuaq pillugu Qaasuitsup Kommunia piareersalerpoq, suleqatigiissitamillu maanna pilersitsinialerpoq, uuliamik nassaartoqassappat kommunip suna eqqummaariffigissaneraa suleqatigiissitap taassuma paasiniassavaa.
- Uuliamik qalluinissaq kommunitsinni inuussutissarsiornermut sunniuteqassagunavippoq, umiarsualivinnillu atortorissaarnerusunik sanaartornissaq pisariaqalissagunavippoq, aamma sullissivinnik arlalinnik sanaartornissaq eqqarsaatigineqartariaqarluni, Qaasuitsup Kommuniani borgmesteri, Jess Svane, oqarpoq.
Danmarkimi Offshore Center suleqatigiissitami ilaalereerpoq, Norgillu avannarpasissuaniit aggersaanissaq kommunip aamma eqqarsaatigaa, taakkumi issittumi uuliasiornermik misilittagaqarmata. Tamanna Sermitsiami allaaserineqarpoq.