Uuliasiulernissamut takorluugaqarneq kinguneqarnerlussinnaasoq
Mexicop imartaani uuliaarluernerujussuup kingunerisaanik Kalaallit Nunaanni uuliasiulernissamut takorluugaqarneq kinguneqarnerluleriaannaavoq.
maajip 15-at 2010 12:16
Danmarkimi nunanilu tamalaani issittup imartaani uuliamik qillerinissaq akerlerineqaleraluttuinnarpoq.
-Mexicomi uuliap seerinerisa kingunerisai eqqarsalertitsipput, tamakkumi takorloorsimanngilluinnarpavut, avatangiisinut ministeriaqarfimmit ilisimatuut oqarput.
Kalaallit Nunaat tikikkuminaassinnaasarpoq silarlungaatsiarsinnaasarlunilu taamaattumik Kalaallit Nunaanni uuliakoortoqassagaluarpat kingunerisinnaasai ajornartorsiutaangaatsiarsinnaapput, Venstret avatangiisinut oqaaseqartartuat, Eyvind Vesselbo JyllandsPostenimut oqarpoq.
Kalaallit Nunaanni qillerinissamut Dong Energy akuerisaareerpoq, imaanilu kilumiiterimik ititigisumi qillerisoqassalluni. Mexicop imartaani qillerinermi 1.500 miiterinik ititigisumi qillerisoqaraluarpoq.
