Uuliasiorusuttut imaaginnavipput
Cairn Energyp gassimik nassaarfiata eqqaani uuliamik ujaasiniarlutik qinnuteqartut aqqaneq marluupput, aviisi Ingeniøren nittartakkamini ullaaq manna tamaatut allaaserisaqarpoq.
Uuliasiorniarlutik qinnuteqartut tamarmik isumaqatigiissuteqarfigineqarnissaat aatsitassanut pisortaqarfimmi allaffimi pisortamit Jørgen T. Hammeken-Holmimit ilimagineqanngilaq.
Aatsitassanut Ikummatissanullu pisortaqarfik uuliamik misissueqqaarnissanik 14-inik neqerooruteqarmat, uuliasiortitsiviit aqqaneq marluk, uulianik mississuqaarnissanut 17-inut qinnuteqarput, taakkualu maannakkut isumaqatiginniarniarfigaagut, Aatsitassanut pisortaqarfimmi allaffimi pisortaq Jørgen T. Hammeken-Holm oqarpoq.
Gassimik nassaarfigineqartup nalaata sananeqaataanik takussutissat uuliasiortitsivinnit allanit soqutigineqartorujussuupput.
- Nassaarfiusup sananeqaataanik takussutissat uppernarsaatillugu Cairn Energyp pigisarai, ilisimasanilu tuniniarsinnaallugit, taamaattumik Cairn Energyp nammineerluni aalajangissavaa taakkua tuniniaqqissannerlugit, Jørgen T. Hammeken-Holm oqarpoq.