Uuliasiortut qanimut nakkutigineqartariaqarput

Mexicop kangerliumanersuanisut ajornaarnersuaqassanngippat, uuliasiortut arlaannaannut atanngitsumit nakkutigineqarnissaat pisortat qulakkeertariaqarpaat. Alaska-mi, uuliasiornermik ukiuni 30-ni misilittagaqarfiusumi, naalagaaffiup immikkoortuani inatsisartunut ilaasortaq, Reggie Joule, oqarpoq.
Allattoq Jens Thorin
juunip 28-at 2010 17:19

Uuliasiortut imminnut nakkutigisinnaanngillat. Taamaammat naalakkersuisut qimmitut kiisortutut uuliasiortunut nakkutiginnittuusariaqarput. USA-mi naalagaaffit ilaata Alaskap inatsisartuini ilaasortaq isumaqarpoq.

- Avatangiisit illersorneqarnissaat uuliasiortut qaffasinnerpaamiitissappassuk, uuliasiortut inuillu taakkunannga nakkutiginnittut imminnut sillimmartaarfigisariaqarput. USA-mi naalagaaffit ilaata Alaskap inatsisartuini ilaasortaq Reggie Joule, ICC-mut ataatsimeersuariarluni maanna Nuummiittoq oqarpoq.

Alaskamiut uuliamik qalluinermik ukiuni 30-ni misilittagaqarput, annermilli nunami qalluillutik. Mexicop kangerliumanersuani uuliaarluertoqareersorlu, USA-p præsidentiata Barack Obamap immakkut uuliasiornissamik pilersaarutit tamaasa unikkallartippai.

Taamaliorneq Reggie Joulep nuannaarutigaa. Taanna isumaqarpoq, Mexicop kangerliumanersuani ajunaarnersuup takutikkaa, USA-p tamarmiusup naalakkersuisuisa BP-mik nakkutiginninera pitsaasimanngitsoq.

- Soorluuna USA-p tamarmi naalakkersuisui uuliasiortunit akuuffigineqanngitsumik nakkutilliisimanngitsut. Nakkutiginnissimagaluarunik oqarsinnaasimassagaluarput, ima pisoqariataarsinaaneranut uuliasiortut ima imalu ittunik atortoqartariaqarput, Reggie Joule oqarpoq.

Taanna aamma isumaqarpoq, inuussutissarsiortut uuliasiortut suliassaataannik suliassarsisinaaniassagunik sukataartuusariaqartut.

Aammattarlu inuiaqatigiit uuliasiorfinnit piginneqataalernisssaq sukataarutigisariaqaraat, taamaalillutik aningaasanik pissarsisinnaaniassagamik.

Alaskami uuliasiornerup malitsigisaanik inuit inooqatigiinnikkut suli ajornartorsiortut inatsisartuni ilaasortaq oqaluttuarpoq.

- Inuit amerlavallaat imigassamik aalakoornartulimmik aanngajaarnartunillu allanik pingitsuuisinnaanngillat, tamannalu maannamut ajornartorsiutaavoq. Tamakkualu kusanarpallaanngillat, Reggie Joule oqarpoq.

Taassuma Alaskami naalakkersuinikkut ukiuni kingullerni sisamani ineriartorsimaneq ICC-mi ataatsimeersuartunut nassuiaassutigaa.