Uuliasiortut arferit mianerinerusariaqarpaat
Danmarkimi atuagassiap aalajangersimasumik sammisaqartup Ingeniørenip ulluni kingullerni allaaserisaqattaagai tunngavigalugit, tamatumunnga assingusumik Cairn Energyp siorna misissuinerinut qallunaat immikkut ilisimasallit oqartussanut siorna mianersoqqusisimanerinik tusagasseereersugullu, Namminersorlutik Oqartussat taama nalunaaruteqarput. Tassami immap naqqanik sajuppillatsitsisarluni misissuinerni nipip maligaasai sakkortuut immamut aallartinneqartartut, arfernik ima ajoqusersuitigisarput, ilisimatuut isumaqarlutik, arferit uumaffimminniit qimaatinneqarsinnaasut.
Namminersorlutik Oqartussanit maanna erseqqissarneqarpoq, ukiormanna akuersissutinik suli tunniussisoqanngimmat aamma Baffinip Kangerliumanersuani misissuinissamut qinnuteqartussatut ilimagineqartut sisamaasut, akuerineqannginnerini qinnuteqaataat misissoqqissaarniarneqarput. Aatsitassanut naalakkersuisoq Ove Karl Berthelsen taama erseqqissaavoq.
Tamatuma peqatigisaanik piumasaqaatit sakkortunerulersinniarneqarput, taamaalilluni ilaatigut uuliasiortitseqatigiit soorlu qilalukkat qernertat sumiittarnerinik misissuinissaminnik pisussaaffilerniarneqarlutik, soorlu immap naqqani sajuppillatsisarluni misissuinerit sioqqullugit, misissuinerup nalaani aamma misissuereernerup kingorna timmisartumit misissuisoqartarnissaa piumasariniarneqarluni.
Tamatuma saniatigut uuliasiortitseqatigiit piniartunik suleq ateqarlutik piniarnernik misissuisassapput, taamaalilluni sajuppillatsitsarluni misissuinerit piniarnermut sunniuteqarnersut paasineqarsinnaaniassammat.
Qaammat ataaseq qaangiuppat ukioq manna misissuinissamut qinnuteqaatit tamanut tusarniaassutigineqassapput, Namminersorlutillu Oqartussat naatsorsuutigaat, uuliasiortitseqatigiinnit arfineq marluusunit akuersissuteqarfigineqareersunit ikinnerunnguitsunit qinnuteqaateqartoqartumaartoq.
