Uuliasiortussanik pilersisaarineq sakkortusineqaqqippoq
Nunatta kitaata imartaani uuliaqarsoralugu misissuineq suli ingerlanneqarpoq. Ukioq manna apriilimi aallartittumik uuliaqarsoralugu misissuisinnaasunut neqerooruteqartoqarpoq, ataatsimiinerit ingerlanneqartarneranni København-imi, USA-milu naalagaaffiit ilaanni Texas-imi.
Misissuinissamut qinnuteqarsinnaaneq ippassamut killeqarpoq, aatsitassanullu pisortaqarfimmiit ullumi ilisimatitsissutigineqarpoq, nunarsuarni uuliasiorfiit annerpaartaasa ilaat misissuinissamut qinnuteqaateqarsimasoq.
Aatsitassat pillugit Naalakkersuinikkut akisussaasoq Jørgen Væver Johansen oqarpoq, ukiuni kingullerni marlunni misissuisussanik pissarsiniartarnermi, uuliasiortut nunarsuatsinneersut soqutiginninnerat suli malunnartoq, naak misissuinerit uuliamik nassaarfiuneq ajoraluartut, 2000-milu qillerinermi nassaartoqanngikkaluartoq.
Jørgen Væver Johansen-ip ilanngullugu oqaatigaa, naalakkersuisut misissuisitsisarnissamut akuersissuteqatarnerminni politikkertik ukiuni tulliuttuni ingerlatiinassagaat ilamagalugu.
Uuliasiorfiit nunarsuarmi annerpaartaasa ilaat sorleq misissuinissamut qinnuteqaateqarsimanersoq nalunaaritigineqanngikkallarpoq.
