Uuliasiortoqalissappat avatangiisit paarilluarneqassapput

Aatsitassanut Naalakkersuisoq Jørgen Væver Johansen uuliamik gasimilluunniit nunatsini nassaartoqassagaluarpat iliuuserineqartussat pillugit nalunaarusiamik saqqumiussaqaqqammerpoq.

Uuliaqartoqarneranik gasseqarneranilluunniit misissuinerit pillugit, nunatsinni suut sinaakkutigineqassanersut pillugit Naalakkersuisut 2003-mi najoqqutassiorput.

Taamani aaliangiunneqarpoq Nunatta kitaata kippasinnerusortaanit Qeqertarsuup Tunua Nuussuarlu tikillugit misissuinissat eqqarsaatigineqarnerussasut.

Tamannalu malillugu nalunaarusiortoqarpoq, nalunaarusiamilu saqqummiunneqarpoq uuliamik gassimilluunniit piianissamut nunarput periarfissaqartoq, tamannalu pisinnaassasoq ikinnerpaamik ukiut qulit qaangiuppata.

Tamanna piviusunngussappat nunat allamiut suliffeqarfiutaat nunatsinnit isumalluutigineqassapput, taakku misissuinerni aningaasaliilluarsinnaammata.

Naalakkersuisut aamma aningaasaateqarfimmik pilersitsinissamik pilersaaruteqarput, nunat allamiut soqutiginninnerulernissaat siunertarineqarluni. Uuliaqarfimmik qillerivimmik pilersitsineq milliard koruunit affaanik akeqartoq nalunaarusiami allassimavoq.

Uuliasiortoqalissagaluarpat gassimillu nassaartoqassagaluarpat siunissami annerpaamik 70 milliard koruunit kaaviiaartinneqarsinnaasut aamma taaneqarpoq.

Nalunaarusiami naqissuserneqarportaaq, uuliasiortoqalissagaluarpat gassimillu qalluisoqalissagaluarpat avatangiisit paarilluarneqassasut. Tassani pineqarput piniartut, aalisartut, takornariartitsisartullu pinngortitamik isumalluutillit.

Nalunaarsusiaq inatsisartut upernaakkut ataatsimiilerpata oqaluuserineqassaaq.