Uuliasiortitseqatigiiffissuarmit tarsiiffigeqqusut
Tunniussinerminnut tunngavilersuutigaat suliffeqarfissuit gassinik silaannarmik kissakkiartortitsisunik aniatitsinermikkut nunaqarfimmiut inuuniarnerminni tunngavigisaannik navianartorsiortitsinerat. Nutaarsiassaqartitsivik CNN-news taama nalunaarpoq.
Nunaqarfik Kivalina Alaskami ipiutami pukkitsumiippoq, illoqarfiup Anchoragep avannaani kitaani 1000 kilometerinik ungasissusilimmiippoq, 400-nillu inoqarluni.
Taakkua qangaaniilli piniartutut inuupput, kisianni nunarsuarmi silap kiatsikkiartornerata kinguneranik, kingusinnerusukkut sikusalerneratigut ipiutallu nunaqarfiup inissisimaffigisaata neriorneqarneratigut inuuniarnerat allanngorluinnarsimavoq. Eqqartuussissuserisut taarsiissuteqaqqusinermik suliaqartut oqaatigaat, silap pissusaata allanngornerata kinguneranik nunaqarfimmiut ukiuni kingullerni aningaasartuutaat 400 miliuunit dollarsit missilioraat – tassa 2 milliardit koruunit missaat.
Kivalinamiut eqqartuussisulersuussinerat soqutigineqaqaaq, tassami nukissiuuteqarfissuarnut unnerluutiginninnerit Amerikamiut naalakkersuisuisa misissuinerinik tunngaveqarmata, taakkunanilu nunaqarfiup kigaatsumik nungukkiartorneranut silap pissusaata allanngornera pissutaasoq qularutissaanngitsumik oqaatigineqareerpoq.
