Aningaasaliisartullu nunap inoqqaavisa pisinnaatitaaffii aamma pingaartittupilussuugaat, professori nassuiaavoq. Ujarak uuliartalik assimi takuneqarsinnaavoq.Assi: KNR Qanorooq

Uuliasiortitseqatigiiffiit nunap inoqqaavisa pisinnaatitaaffi pingaartikkaat

Uuliasiortitseqatigiiffiit nunap inoqqaavisa pisinnaatitaaffii pingaartippaat. Taakkorpiaalli pillugit qanoq suliaqarnissamut Naalakkersuisut uuliasiornermut periusissiaannit nutaajusumit ikiorneqanngillat.

Uuliasiortitseqatigiiffiit nunap inoqqaavisa pisinnaatitaaffii pillugit qanoq suliaqarnissamut Naalakkersuisut uuliasiornermut periusissiaannit ikiorneqanngillat.

Tamanna pingaaruteqaraluarpoq, nunatsinnimi inuit nunap inoqqaavisut akuerineqarnikuummata uuliasiortitseqatigiiffiillu pisinnaatitaaffiit eqquutsinnissaat pingaartikkaluarmassuk. Ilisimatusarfimmi professori, Anne Merrild Hansen, taama oqarpoq.

- Avatangiisinut isumannaallisaanermullu atatillugu aarlerinartut periusissiami nassuiarluarneqarput. Inuiaqatigiinnulli sunniutissat pillugit nassuiaatit pitsaanerusinnaapput, Anne Merrild Hansen oqarpoq.

Uuliasiornermut periusissiaq

 

  • Naalakkersuisut 2020-mit 2024-mut uuliasiornermut periusissiaq ukioq nmanna jannuaarip naanerani akueraat.

 

  • Nunatsinni uuliasiornerup soqutigineqaqqilernissaa periusissiami pingaarnertut aallunneqarpoq.

 

  • Sumiiffinnik pisinnaatitsissuteqarfinnik nutaanik ammaaneq, nunami taamatullu sinerissap avataani.

 

  • Nunap sannaanut aammalu geofysiskinut suliniutinik pisinnaatitsissutinut politikkimut akuusutut ilaatillugu ingerlatsinissaq.

 

  • Uuliasiornermut suliffissuarnut iliuuseqarluni nittarsaassilluni suliniuteqarneq.

 

  • Atugassarititaasunut killissaliussanik naleqqussaaneq, ilanngullugu ’first-mover’-nut aaqqissuussineq nutaaq, periusissiap atuuffissaani atuuttussaq, naapertorlugu akileraarusiisarnerup annertussusaanik immikkut naleqqussaanissaq.

 

  • Naalakkersuisut siulittaasuata, Kim Kielsenip, nunatsinni sumiiffiit pillugit akuersissutit nutaat saqqummiunneqartut sapaatit akunneranni 6-imi Houstonimi ussassaarutigiartorpai.

 

  • Tamatuma kingorna Namminersorlutik Oqartussanit atorfilittat Londonimut  februarip ulluisa qulinganni nittarsaassiartorput.

Paasissutissat: Naalakkersuisut

Nunatsinni amerlanerussuteqartut naggueqatigiinnut inunnut ilaagaluartut, tassalu nunani allani nunap inoqqaavitut ikinnerussuteqarnatik, nunatsinni inuit nunap inoqqaavisut akuerineqareerput, taamaalillunilu aamma Naalagaaffiit Peqatigiit inuit pisinnaatitaaffii pillugit isumaqatigiissutaannut ilaallutik.

Uuliasiortitseqatigiiffiillu nunap inoqqaavisa pisinnaatitaaffiinik unioqqutitsisutut assuarineqausunnatik nunap inoqqaavinut pissusilersorluarnissartik pingaartikkaat, professori oqarpoq.

- Taamaalillunilu uuliasiortitseqatigiiffiit uatsinnut qanoq pissusilersornissaminnut mianersortarput. Taamaammat iluamik suliarisinnaanissaanut takutitsisinnaaneq pingaartupilussuuvoq, Anne Merrild Hansen oqarpoq.

Nunap inoqqaavisa ilaatigut "kiffaanngissuseqartumik, sioqqutsisumik aamma paasinnittumik akuersisinnaatitaaneq" pisinnaatitaaffigaat. Tassalu inuit sunnerneqartussat isumaat qajassuullugit ineriartornissamullu tunngaviit isumaqatigiissutigalugit akuersissutinik nutaanik tunniussisoqartariaqartoq, ilisimatooq oqarpoq.

AAMMA ATUARUK Kielsen uuliasiornermut soqutiginnilersitseqqikkusuppoq - iluatsissimanngitsoq akerlilerpaa

Nunap inoqqaavisa pisinnaatitaaffii pillugit suliaqarneq aamma uuliasiortitseqatigiiffinnut aalajangiisuunerpaajusinnaasoq, Anne Merrild Hansenip ilanngullugu oqaatigaa.

Aningaasaliisartummi soorlu Nunat tamalaat aningaaserivissuata European Investement Bankillu pisinnaatitaaffiit pingaartittupilussuugaat, professori nassuiaavoq.

- Ingerlatseqatigiiffinnut nunap inoqqaavisa pisinnaatitaaffiinik eqquutsitsinermik innuttaasullu nunap ilaaniittut tusarneqarsimanissaannik suleqatigisimanissaannillu takussutissaqanngitsunut taavalu ammasumik ingerlatsinngitsunut taarsigassarseerusunneq ajorput, Anne Merrild Hansen oqarpoq.

AAMMA ATUARUK Uuliasiorneq oqaluuserilerpaat

Uuliasiortitseqatigiiffiilli aningaasaatilissuit aningaasaliisussarsiortariaqanngillat.

Taamaattoqartillugu ingerlatseqatigiiffiit qanoq ileqqqorissaarnissamik najoqqutassaat tassa "code of codeks"-ii, inatsillu atuuttut nunap inoqqaavisa pisinnaatitaaffii qanoq eqquutsinneqarnissaannut aalajangiisarput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat