Uuliasiortitseqatigiiffiit milliarderpassuarnik qularnaveeqqusiisalissapput
Nal. 10.38 nutartigaq
Uuliamik tassanngaannaq mingutsitsisoqalissagaluarpat Nunatta karsiata aningaasaateqarnissaa milliardit koruunerpassuit taakku qulakkiissagaat, Tuluit Nunaanni aviisimi, The Guardianimi ullumi allaaserineqarpoq.
Aviisimi allaaserineqartut naapertorlugit, uuliasiortitseqatigiiffiit tamarmik immikkut 10 milliardit koruuninik qularnaveeqqusiinissaat Nunatsinni oqartussaasut piumasaraat.
Nunarsuatsinni aatsaavissuaq taama piumaqartoqassagunartoq, aviisimit The Guardianimit tikkuarneqarpoq, aviisimillu ilimagineqarpoq, naalakkersuisut amerlasuut piffissami aggersumi taamaaliortalerumaartut.
Aviisimi allaaserineqartut naapertorlugit Kalaallit Nunaanni oqartussaasut uuliasiortitseqatigiiffiillu akornanni massakkorpiaq isumaqatigiinniartoqarpoq.
