Uuliasiornissaq akuersaarpaat

- Misileraallutik qillerissappata ajunngilaq. Kisianni aappaatigut Amerika qiviaqqajaanarami. Cairn uuliamik toraarsissappat, mingutsitsinissaq aamma annertussagami, taamaammat isumaqataallungalu isumaqataanngilanga, Peter Møller oqarpoq.

Kristoffer Petersenip akuersissuteqarneq aamma eqqarsarnartoqartikkaluarpaa.

- Kisianni avaqqunneqarsinnaanngilaq, tamarmik aningaasat atorfissaqartippaat. Naak suli nassaartoqanngikkaluartoq oqaatigineqarpoq, Nunatsinni uuliaqartorujussuusoq. Tamatta taanna atorfissaqartipparput.

Nunani allani mingutsitsinerujussuaq qanorluunniit sillimaniartigigaluaraanni avaqqunneqarsinnaanngitsoq takuarput. Kisianni sillimaniarneq annertoorujussuusoq nalungilara, aamma isumaqarpunga eqqortuusoq, Kristoffer Petersen oqarpoq.

Uuliamik nassaartoqassappat, aningaasatigut iluaqutissartai mingutsisisoqaratarsinnaaneranit pingaarnerusut, Jonathan Jonathansen isumaqarpoq.

- Kalaallit Nunaat siuariartussappat, aningaasat apeqqutaasorujussuussagamik aamma.

Tusaamavarput, Mexicop ajutoortoqarluni uulia aniaannavilersimasoq. Taamannak Nunatsinni pisoqariataarsinnaaneranut oqartussat piareersimanersut tatigaagit?

- Mexicop eqqaani taamatut pisoqarneranut piareersimanngippata, aamma maani piareersimavallaarnavianngillat. Taqqavani pisoq piareersimalernissamut iluaqutassaaq, Jonathan Jonathansen oqarpoq.

Uuliap anigaasarsiornitsinnut iluaqutaalluarnissaa, Ilulissaneersup Rigmor Villadsenip isumalluarfigaa:

- Uuliamik nassaartoqaraluarpat, Nunatta aningaasarsiorneranut ikorfartuutaasinnaavoq, Rigmor Villadsen oqarpoq. Aammali Mexicop kangerliumanersuanitut mingutsitsisoqarsinnaanera ernummatigaa.

- Uagut puisit assigisaallu nerisaraagut. Taamaammat ernumanartoqarpoq. Neriuppunga, periaasissat ilanngullugit eqqarsaatigilluarneqarsimassasut.