Uuliasiornissamut piumasaqaatit naammassinngilai
Inuussutissarsiutinut Aaatsitassanullu Naalakkersuisup, Ove Karl Berthelsenip suliffeqarfik suna pineqarnersoq pillugu ilisimatitserusunngilaq. Kisiannili radioaviisimut oqaatigaa, suliffeqarfik pineqartoq Kalaallit Nunaanni sumiiffinni allani uuliamik ujaasinissaminut kisermaassisussaatitaanngitsoq.
Taamaalilluni ujaasiffissatut neqeroorutigineqarsimasut suliffeqarfinnit kikkunnilluunniit qinnutigineqarsinnaanngorput.
- Kikkut tamaasa akuersissutinik tuniorarusunngilagut, malittarisassagut sakkortunerpaanut ilaapput, Ove Karl Berthelsen oqarpoq, nangillunilu teknikkikkut aningaasaqarnikkullu piumasaqaatit qinnuteqartup naammassisimanngikkaa oqaatigalugu.
- Ujaasiffissaatigut neqeroorufigissagaanni, teknikkikkut ilisimasaqarnissaq uuliamillu maqisoornerup qanoq passunneqarnissaanik ilisimasaqarnissaq suliffeqarfiit pigisariaqarpaat aamma nukittuunik milliarderpassuarnillu aningaasaatilinnik suliffeqarfinnik tunuliaqutaqarnissaq pisariaqarpoq. Qinnuteqartut taakku naammassisinnaasimanngilai, oqarpoq.
- Aammattaaq Kalaalllit Nunaata Kitaata Kujataa immikkorluinnaq ilisimasaqarfigisariaqarpoq, Ove Karl Berthelsen nangippoq.
Ujaasiffissatut neqeroorutigineqartup imartaa itisoorujussuuvoq. Allaat ilaatigut 2-3 kilometerinik itissuseqarluni.
Ujaasiffissap naqqata sananeqaataa nalorninartorujussuuvoq, taamaattumik suliffeqarfiit misilittagartuut atorneqarnissaasa saniatigut ujaasinermi periutsinik allanik atuisoqarnissaanik piumasaqaateqarpoq.