Uuliasiorniarnissamut qinnuteqarfissaq qanillivoq

Sapaatip akunnera ataaseq qaangiuppat – decembarip 15-anni unnuaqeqqarpat – Aatsitassanut Ikummatissanullu Pisortaqarfiup Qeqertarsuup eqqaani qillerilluni uuliamik ujaasinissamut qinnuteqaatinut killiliussaa qaangiutissaaq.

Aatsitassanut Ikummatissanullu Pisortaqarfimmit suliffeqarfiit aqqaneq-marluk uuliamik ujaasinissamut aggustimi akuerineqarput maannalu Aatsitassanut Ikummatissanullu Pisortaqarfimmit pissanngatigineqarpoq suliffeqarfiit qassit misiligutigalugu uuliamik qillerinissamut qinnuteqassanersut.

- Maannamut suli qinnuteqartoqanngilaq, Aatsitassanut Ikummatissanullu Pisortaqarfimmi pisortaq Jørn Skov Nielsen oqaluttuarpoq.

- Kisianni tamanna nalinginnaasuuvoq. Qinnuteqaatit piffissaq kingullerpaaq atorlugu takkuttarput, kisianni suliffeqarfiit arlallit qinnuteqaatiminnik inaarsaaleruttortut oqaloqatigaavut, Jørn Skov Nielsen oqarpoq.

Qinnuteqartoqareerpat qinnuteqartut Aatsitassanut Ikummatissanullu Pisortaqarfimmit nalilersorneqassapput.

- Tullianik tallimanngornerunissaa qilanaaraarput neriulluarlutalu, Jørn Skov Nielsen oqarpoq