Uuliasiornermut isumannaallisaaneq Norgemi sukaterniarneqarpoq
Norge sakkortuunik malittarisassaqartutut isumannaatsuunissamillu qaffasissumik inissisimasutut uuliasiorluni qillerisartunit isigineqarpoq.
USA-mi uuliasiornikkut ajutoornerup kinguneranik, uuliasiornerup allannguuteqarnissaa, Norgemi piareersimaffigineqartariaqartoq, Norgemi avatangiisinut ministeri Erik Solheim isumaqarpoq.
- Mexicop Kangerliumanersuani uuliaarluerfiusup annertussusaa Norgemi nunap immikkoortuisa pingajoraarterutaata aappaanut assersuunneqarsinnaavoq, Erik Solheim oqarpoq.
Norgep imartaani taamatut ajutoortoqarsinnaanera ministerip takorlooruminaatsillugu, atuagassiamut teknikkimik sammisaqartumut oqaatigaa.
Tassami 2004-mi ajutoortoqarujussuangajappoq.
Tassa ukiut arfinillit matuma siornagut, uuliamik qilleriviusimasumi atorneeruttumi, gassimik aniasoqarujussuarneratigut, Norgep avataani uuliamik qillerivimmi sulisut qimarngussorneqarput, teknikkimik isumannaatsuunissamillu suliaqartut 36-t kisiisa pinnagit.
Qillerivik tamakkiisumik inuerutsinneqarsimagaluarpat, gassi qaartoornertut ililluni ikuallatsitsisimassagaluarpoq, taannalu qaammatini arlalinni ikumasimassagaluarluni. Ikuallannerlu qillerivinnut arlalinnut siaruaassimassagaluarluni.
Taamali pisoqannginneranut isumannaatsuunissamik suliaqartut qillerivimmik matusisinnaasimanerat pissutaasoq, iluatsitsinerujussuusorlu, atuagassiami Ingeniørenimi allaaserineqarpoq.
