Uuliasiornermik ilisimasalik eqqissiimeqqusivoq
Atammiup avataani qilleriffiit marluusut, novembari naallugu qilleriffigineqassasut Cairn Energyp ullumi tusagassiutinut nalunaarutigaa. Qilleriffimmi taagukkami AT7-1-imi, qillerinermi sioqqat anguneqarmata, paasinarsivoq taakku ataanni uuliaqassagunartoq. Taamaattoqarnera paasinarsimmat Cairn Energy siullerpaamik atortunik akisuukasinnik, taagukkanik MTD-nik atortoqarlutik sioqqat misissuiffiginialerpaat.
Siorna paasisanik taama pitsaatigisunik paasisaqartoqarnerata kingorna aatsaat taama ilimanaateqartigisunik paasisaqartoqaqqittoq, Danmarks Teknisk Universitetip ataaniittumi Kemiimut tunngasunut Institutimi pisortaq, Erling Halfdan Stenby oqarpoq:
- Siusinnerusukkut tusagassiutinut nalunaarutigisartagaat eqqarsaatigissagaanni, massakkut qilleriffianni paasisaasa ilimanaateqarluartilerpaa uuliaqarnera gasseqarneralu. Atortorissaarut uutortaat MDT-i atorlugu itinerusumi Cairn Energy-p misissuinialersaarnerisa ersersippaat taakku pimoorussisut, tassami atortorissaarutit taakku atorlugit misissuinerit akisuukasiusarput, aatsaallu atorneqartarlutik imminut akilersinnaasumik nassaarnermik neriuuteqaraanni, Erling Halfdan Stenby oqarpoq.
Uuutortaatip MDT-ip uuliap qanoq ittuunera uuttortarsinnaavaa aammalu uuttortarsinnaallugu uulia qanoq annertutigisoq sioqqanut akuunersoq.
Uuutortaat MTD-i atorlugu misissuineq qanoq akisutiginersoq, Erling Halfdan Stenby-p oqaatigisinnaannginnerarpaa, millionerpaalunnilli akeqassasoq taassuma ilimagaa.
Qeqertarsuup avataani siorna paasineqaraluarpoq uuliaqartoq, qalluinerli imminut akilersinnaanngitsoq aamma paasineqarluni. Maanna paasisat siorna paasisanut assersuunneqarsinnaasut Erling Halfdan Stenby-p oqaatigisinnaannginnerarpaa:
- Siorna Qeqertarsuup avataani nassaaraluarnerisa maanna nassaarneq assersuunneqarsinnaalluarpoq, tassami uuliaqarfik sioqqamik 50 meterimik qallerneqarsimasoq annertusinnaanngilaq. Neriunarnerujussuussagaluarpoq 100 meterisut imaluunniit 200 meterisut immap naqqanit ammut sioqqanik qallersimasumi nassaarsimassuuppata.
Erling Halfdan Stenby naliliivoq oqaluni maanna ersaattaattoqarnissaa siusippallaarunartoq:
- Tusagaq ajunngilluinnaraluarpoq, kisianni imminut akilersinnaasumik qalluisoqarnissaanut paasisaat annikippallaarput, taamaattorli alloriarnissamut tullermut paasisaat atorluakutsoorsinnaapput.
Danmarks Teknisk Universitetip ataaniittumi Kemiimut tunngasunut Institutimi pisortaq, Erling Halfdan Stenby oqarpoq.
Ukiormanna qillerinerit sapaatit akunneri marluk imaluunniit pingasut qaangiuppata naammassineqarpata, Nunatta Kitaani 2011-mi qillerinerit tamakkiisumik naliliiffigineqassasut, Cairn Energy-mit nersiorsuutigineqarpoq.
Cairn Energyp aktie-aataat aasaq manna annertugaatsiartumik nalikilleriarput. Taakku aktie-aataat 2 procentimik ullumi qaffarialaartut tuluit aviisiat The Guardian allappoq.
