Uuliasiornermi suliffissat ikilissapput
Cairn Energyp imartatsinni misiliillutik qillerinerani nunami sullissisuusut, Arctic Base Supply-p ukioq manna qillerisoqartussaanngimmat sulisut ikilisartariaqarsimagai, Arctic Base Supply-imi pisortaq, Steen O. Hansen taama oqarpoq.
- Siorna aningaasat kaaviaartitagut eqqarsaatigigaanni ukioq manna taakku ikinnerussapput, tamannalu pissutigalugu ukioq manna sulisorisinnaasagut ikilisartariaqarsimavagut pingasuinnanngortillugit, Arctic Base Supply-imi pisortaq, Steen O. Hansen taama oqarpoq.
- 2011-mi sulisut amerlanerpaammata 50-inik sulisoqarpugut, ukiorlu maanna sulisut ikilisartariaqarsimavagut. Tamannali naatsorsuutigeersimavarput, tassami nalunnginnatsigu uuliasiornermi misiliilluni qillerinerit ingerlaavarsinnaanngitsut, Steen O. Hansen oqarpoq.
Arctic Base Supply-ip sulisorisimasai 50-it, Nuummi Aasiannilu sulisuugaluarput.
Nuummi sullissisut ilaat, Nuuk Transport aningaasanik kaaviiaartitaminnik aamma eqqugaapput, taakku naatsorsuutigaat aningaasat kaaviiaartitatik 5 procentimiit 8 procentip tungaanut ikilissasut, Nuuk Transportimi ingerlatsinermut pisortaq, Frederik Hansen taama naliliivoq.
Cairn Energy-p Qeqertarsuup Tunuani misiliilluni qillerinerata nalaani Aasianni suliffeqarfiit nuannaarutigisaannik aningaasaqarneq ilorraap tungaanut aallaraluarpoq.
2010-mi sullissinernut akiliutit, unnuisarfinnik atuinerit, neriniartarfinnik atuinerit, nioqqutissanillu pisiniartarneri, 10 million koruuniniit 12 million koruunit tungaannut kaaviiaartinneqarsimammata, 2011-milu kaaviiaartitat ikinnerulaarsimallutik.
Qaasuitsup Kommuniani aatsitassarsiornermut ataqatigiissaarisoq, HansPeder Barlarch Christensen oqarpoq, ukioq manna qillerisoqartussaannginnera anersaartorfissatut isigineqartoq, piareersarnissamullu piffissaq atorneqartoq.
- Ilinniartitaanermi piumasaqaatit piareersarsinnaavagut. Suliffeqarfiit suliassanut neqeroorsinnaanerminnik piareersaasiornissaminnik sungiusarsinnaapput. Suliffeqarfiillu imminut piukkunnarsarlutik, Hans Peder Barlarch Christensen oqarpoq.