Uuliasiornermi qillerissutit allat atorneqassapput
Qillerissutit Stena Don Stena Forthilu Cairn Energymit 2011-mi atorneqartussaanngillat. Taamaattumik Norgimiut ingerlatseqatigiiffiannit Ocean Rigimeersut qillerissutit marluk aasaru atorneqassapput.
Aappaa qillerissut Leiv Eiriksonimik taaguutilik 37-eriarluni immani itisuuni Angolami, Congomi, Tuluit Nunaanni Irlandimilu atorneqareersimasoq aasaru Nunatsinnukassaaq. Taanna ilaatigut uuliasiortitseqatigiiffissuarnit ilaatigut Exxonimit, Chevronimit, Shellimit aamma oqallisaaqisumit BP-mit atorneqareersimavoq.
Umiarsuaq qillerissut Corcovado aappaattut atorneqartussaq Koreami Kujallermi sananeqaqqammerpoq.
Inuit aasaq kingulleq uuliamik ujaasilluni qillerinermi sulisorineqartut, aasaru sulisorineqaqqinnissaat Cairn Energyp aamma neriorsuutigaa,
Taamatuttaaq Qeqertarsuup Kitaani uuliamik ujaasilluni aasaq kingulleq qillerinermi misilittakkat maangaannartinneqannginnissaat uuliasiortitseqatigiiffiup neriorsuutigaa.
- Qillerinermi qullersatut inissisimasut taakkuuginnassapput. Taakku Cairn Energyp atorfeqartitarai, avatangiisinilu Qeqertarsuup eqqaanitut ittuni misilittagaqarluarlutik, Cairn Energy qarasaasiakkut Radioaviisimut allakkani taama nalunaarpoq.
Taamaattorli qillerinermik suliaqartut allanik inuttaqarnissaat ilimanarpoq.
- Qillerivinni sulisut allaassagunarput, tassami qillerissut Ocean Rig, aasaru atorneqartussaammat. Tamannali uuliasiornermi nalinginnaasuuvoq, Cairn Energy akissummini allappoq.
Naalakkersuisut ilisimatitsipput aasaq kingulleq ujaasilluni qillerisoqarnerani akileraarutitigut isertitat 425 millionit koruuniusut, taakkulu saniatigut kalaallit suliffeqarfii pilersuisutut sullissisutullu atorneqarsimasut.
