Uuliasiornermi eqqagassat ulorianartut aallarunneqartassapput

Uuliasorniarluni qillerinerni eqqagassat Kalaalllit Nunaannut toqqortserneqarnavianngillat, tamakku eqqagassat nunanut allanut arsartorneqassapput.
juunip 21-at 2010 17:22

Taama naqissusiivoq Aatsitassanut Naalakkersuisoq Ove Karl Berthelsen tusagassiutinut nalunaaruteqarluni.

Taama nalunaaruteqarnera pivoq, Aasianni eqqagassat ulorianartut inissinneqarsinnaannginnerat pillugu radioaviisi ilanngutassioreersorlu.

Eqqagassat ulorinartut soorlu: uuliakut, qalipaanermi sinnikut kemikaliallu assigiinngitsut nunanut allanukaanneqartarnissaat Ove Karl Berthelsenip neriorsuutigaa.

- Umiarsuit eqqagassanik ulorianartunik usisinnaasut eqqagassat ulorianartut Kalaallit Nunaata imartaaniit nunanut allanukaattassavaat. Taamaattumik eqqagassat ulorianartut Kalaallit Nunaanni suliarineqartassanngillat, Ove Karl Berthelsen naqissusiivoq nangillunilu:

- Aasianni illoqarfinniluunniit allani eqqaavilerisut igitassat ulorianartut attortassanngilaat.

Ove Karl Berthelsenip aamma naqissuserpaa, eqqagassat sillimaniarnermut avatangiisinullu tunngatillugu illersorneqarsinnaasumik isumagineqarlutillu isumannaarneqarnissaannut Cairn Energy pisussaaffeqartoq. Danmarkimi Avatangiisinut qullersaqarfiup uuliasioqatigiiffiup pilersaarutaat eqqagassanut tunngasut akuersissutiginikuuvaat.

- Danskit Avatangiisinut qullersaqarfianit naliliineq toqqissisimanartutut misigisimanngikkaluarutsigu akuersissuteqarsimassanngikkaluarpugut, Ove Karl Berthelsen oqarpoq.

Eqqagassat isumannaatsumik suliarineqartarnissaat Cairnip akisussaaffigigaa Aatsitassnut Qullersaqarfiup nalunaarutigaa, Cairnillu iluusaat Qullersaqarfiup aamma danskit Avatangiisinut Misissuiveqarfianit alaatsinaanneqartussaasoq Aatsitassat pillugit Qullersaqarfimmit nalunaarutigineqarpoq.