Uuliasiornerit 550 millionit koruuninik isertitaqarfiupput
- Tamanna eqqunngilaq. Kalaallit Nunaat imminut uupakaatinnerarlugu Greenpeacep oqarnera ilumuunngilaq aamma pissusiviusunut attuumassuteqanngilaq. Siorna uuliasiorluni qillerinerit Kalaallit Nunaannut 546,5 mio. koruuninik isertitaqarfiupput, naalakkersuisoq Ove Karl Berthelsen tusagassiuutinut nalunaarummini ilaatigut oqarpoq.
Cairn Energy naalakkersuisunit ukioq kingulleq suleqatigiinnissamut isumaqateqarfigineqarpoq, Impact Benefit Agreementimik taaneqartumik, tassani pilersuinerit sulisoqarnissaq, ilinniartitaaneq ilisimatuussutsikkullu misissuinerit qitiutinneqarput.
- Nunaoil A/S uuliasiornissamut pisinnaatitsissutip 12,5 procentianik piginnittuusoq sinnerlugu Cairn Energyp aningaasartuutinut akiliutai siorna 300 mio. koruuniupput. Toqqaannartumik akileraarutinut isertitat 53 mio. koruunit missaanniipput. Suliffeqarfinnit nunaqavissunit pilersuinerit 150 mio. koruuninik naleqarput, Kalaallit Nunaanni piginnaasanik qaffassaanermut Cairn Energymit aningaasartuutigineqartut 28 mio. koruuniupput, ilisimatuussutsikkullu misissuinerit 15,5 mio. koruuninik naleqarlutik, Ove Karl Berthelsen erseqqissaavoq.
- Annikitsuinnarmik akileraarutitigut isertitaqarnissaq naammagiinnarnianngilarput, ilisimatusarneq annikitsuinnarmik ilinniartitaanerlu annikitsuinnarmik akilertinnianngilagut. Isumaqatigiissutit pitsanngorsartuarnerisigut ukiumiit ukiumut isertitassat pitsaanerulersittarnissaat sulissutigaarput. Taamaattumik uupakaatinneqanngilluaasarpugut, Ove Karl Berthelsen oqarpoq.
Uuliasiorluni misissuinermi qillerinerit Nunatta aningaasaqarneranut sunniutai pillugit nalunaarusiaq Namminersorlutik Oqartussat nittartagaanni nanoq-gl-imi atuarneqarsinnaavoq.
