Uuliasiorneq Nunavummit malinnaaffigineqarluarpoq
Kalaallit Nunaata imartaata Nunavummut atanera pissutigalugu Kalaallit Nunaanni pissutsinut malinnaalluarnissaq pissusissamisoortoq, Nunavummi naalakkersuisut siulittaasuat, Eva Aariaak, isumaqarpoq.
Eqalunni sapaatip akunnerani kingullermi inuussutissarsiornermut atatillugu isumasioqatigiinnermi Eva Aariak Canadami tusagassiorfimmut CBC-mut taama oqaaseqarpoq.
- Ataatsimut imartatta ajoqusinnginnissaat anguniarlugu Canadami naalakkersuisut Kalaallit Nunaat Danmarkilu attaviginerusariaqaraluarpaat, Eva Aariak CBC-mut oqarpoq.
- Uagutsinnut naleqqiullugu Kalaallit Nunaanni uuliamik ujaasineq ukiunik qulinik siuarsimaneruvoq. Naatsorsuutigisinnaavarput uuliasioqatigiiffissuit uagut imartarput aamma soqutigilerumaaraat, taamaattumillu piareersimaffigisariaqarparput qanoq taakkununnga piumasaqassanerluta, Eva Aariak naggasiivoq.