Uuliasiorneq isumannaannerulersinniarpaat

Ingeniørinngorniat siulliit qulit uuliasiornermi upalungaarsimanerup pitsanngorsarnissaata nutarteriffiginissaa periarfissaqarfigilerpaat. Norskit imaani sillimaniarnermut suliffeqarfiat Norsk Veritas avatangiisit illersorluarnerulernissaannik suliniummik aallartitsisuuvoq.

Issittumi avatangiisit pitsaanerusumik paarineqarnissaat Norge-mi oqallisaaqqilerpoq Barentshavemi uuliamik nassaartoqarnerata kingorna.

Norskit maanna isumaliutigileruttorpaat issittup imartaani uuliarluertoqassappat pitsaanerpaamik tamanna qanoq akiorneqarsinnaanersoq.

- Ilinniartut namminnerluinnaq eqqarsaatigisinnaavaat issittumin unammilligassat qanoq iliuuseqarfigineqarsinnaanersut. Assut pissanganarpoq iliuusissanik qanoq ittunik saqqummiussaqarumaarnersut, Kristina Dahlberg Maritimt Magasin-imut oqarpoq, taanna Norsk Veritas sinnerlugu suliami ataqatigiissaarisuuvoq.

Ilinniartut siunnersuutissaat aasamut saqqummiunneqassapput.