Uuliasiorneq aamma aningaasarsiutaavoq

Cairn Energyp nunatta imartaani uuliasiorneranit Nunatta isertitai 2010-mi 172 millioner koruuniniit ukiormanna 311 millioner koruuninut amerleriassagatinneqarput.

Tamanna takuneqarsinnaavoq apeqquteqaat tunngavigalugu Inatsisartut ukiaanerani katersorneranni oqallinnissamut Kattusseqatigiit Partiianneersup Knud Fleischerip siunnersuutaanut akissummi.

Cairn Energy 2010-mi Qeqertarsuup avataani misileraalluni qillerivoq ukiormannalu Qeqertarsuup avataani aamma Nuup avataani misileraalluni qillerilluni. Suli uuliamik qalluisoqanngikkaluartoq taamaattoq uuliasiorneq Nunatsinni inuussutissarsiornermut sunniuteqarluarpoq.

Cairn Energy taakkulu suleqatigisaat nunatsinni sullissinernik nioqqutissanillu 172 millioner koruunit naligannut 2010-mi pisipput. Naalakkersuisut maanna naatsorsuutigaat ukiormanna 311 millioner koruunit naligannut pisiniartoqarsimassasoq.

Aatsitassarsiornermi allatigut aamma ingerlatsisoqarpoq. Taakku ilagaat kujataani Napasorsuarmi kultisiorneq. Aatsitassarsiorneq ataatsimut isigalugu 2010-2011-mi akileraarutitigut isertitat 100-150 millioner koruunit missaanniissagatinneqartut, Aatsitassanut Naalakkersuisoq Ove Karl Berthelsen akissummini allappoq.