Uuliasiorfissuit nunatsinni uuliasiorusoqaat
US Geological Survey-p Tunup imartaani annertuumik uuliaqarsinnaaneranik allaserisaqarnera, ulluni kingullerni nunani allani tusagassiutitigut sammineqangaatsiarpoq. Sammineqarnerata kingunerisaanik Aatsitassanut Pisortaqarfik nunanit allaninngaanniit sianerfigineqartuarpoq. Taama oqarpoq Aatsitassanut Pisortaqarfimmi pisortaq Jørn Skov Nielsen.
-Isumaqarpunga ukiuni kingullerni pingasuni sisamanilu uuliasiorfissuarnut nunatsinni uuliaqarsinnaaneranik Aatsitassanut Pisortaqarfimmit paasititsiniaanigut iluaqutaasimasut. Pingaartumik ukiuni kingullerni marlunni sukumiisumik kitaani uuliasiortussarsiornerput tuniniarluarsimavarput. Tassunga atatillugu tunu qanoq inissisimanersoq aamma paasititsiniutigisarparput, Jørn Skov Nielsen Aatsitassaqarnermut pisoqartarfimmi pisortaq oqarpoq.
Nunarsuatsinni uuliaqarfiit annikilligaluttuinnarnerat, uuliallu akiata qaffakkaluttuinnarnera pissutaallutik, uuliaqarsinnaanermik misissuinerit, nunanilu issittuni aamma misissuinerit imminut akilersinaanerulersippaat.
Qallunaat uuliasioqatigiiffissuata DONG-ip nunatsinni uuliasiorsinnaanerminik misissuerusunnera Aatsitassanut pisortaqarfimmit iluarisimaarneqarpoq.
-Naalagaaffik aqqutigalugu DONG-ip Nuna Oil ukiuni arlalinni pigivaa, taamaammallu nunatsinni pissutsit ilisimasaqarfigilluarlugit, Jørn Skov Nielsen oqarpoq.
Amerikap avannaani Europamilu uuliasioqatigiiffissuit ataasiakkaat nunatsinnut soqutiginnittorujussuupput, Aatsitassanullu Pisortaqarfimmit tamanna iluarisimaarneqarpoq. Oqaatigineqarusunngikkallarporli kikkut massakkut isumaqatiginninniaqatigineqarnersut.
Aatsitassanut naalakkersuisup Jørgen Wæver Johansen-ip sapaatip akunnerata tulliani marlunngornermi tuniniagassanik nutaanik saqqummiissaaq. Tamatumuuna Qeqertarsuarni Nuussuarmilu.
