Uuliasioqatigiiffissuit arlallit Danmarkimit ikioqqupput
Baffinip Kangerliumarnani 151.000 kvadratkilometerisut annertussulisimmi uuliamik ujarlernermi misileraallunilu qillerinissani, uuliasioqatigiiffissuit kikkut Naalakkersuisunit akuersissummik tunineqassanersut aalajangiiffiginissaa sivisujunnaarpoq.
Akuersissutissat 17-niupput, uuliasioqatigiiffissuillu aqaaneq marluk maannamut qinnuteqarsimallutik, taakkulu ilaasa suliffeqarfissuit aningaasanik kukkunersiuisarfiit attavigereersimavaat.
- Kalaallit Nunaata imartaani uuliasioqatigiiffissuit uuliamik ujarlernissartik pilerigeqaat. Nunap, tassa Kalaallit Nunaata, qanoq aningaasaqarnikkut inissisimaneranik paasiniaanerminni ikioqqusut arlallit uagutsinnut saaffiginnereerput, kukkunersiuinermi suliffeqarfissuarmiit KPMG-mit Carina Korsgaard aviisimut Berlingske Tidende-mut ullumi oqarpoq.
Kalaallit Nunaanni akileraartarneq pillugu suliffeqarfissuit KPMG-mit siunnersorneqartarput. KPMG-illu aviisimut oqaluttuaraa, uuliasioqatigiiffissuit neriulluartorujussuusut naatsorsuutigaallu, ukiut tallimat arfineq pingasullu qaagiunnerani Kalaallit Nunaanni uuliamik qalluilersinnaassallutik.
Neriunniartami uuliasioqatigiiffissuit pakatsivallaassanngitsut, tassami ulloq manna tikillugu nassaarineqartoq tassatuaavoq uuliaqarsinnaaneranik ilimanaatilik immap naqqa, sulili tamanna uppernarsarneqarani. Uuliaqarsinnaaneranik nalunaartuuvoq, skotlandimiut uuliasioqatigiiffiat, Cairn Energy. Ilimagineqarpoq uuliasioqatigiiffik taanna aamma qinnuteqartunut ilaassasoq.
Maannamut qinnuteqartut ilisimaneqalereersut ilagaat, hollandimiut tuluillu ataatsimut uuliasioqatigiiffiat, Shell aamma norskit uuliasioqatigiiffiat Statoil, kisiannili qinnuteqartut kikkuuneri suli pisortatigoortumik avammut nalunnarutigineqanngillat.
