Uuliasioqatigiiffik gassisiorfillu kalaallit piat pilersinneqassaaq
Kalaallit Nunaat – GONG - Grønlandsk Olie og Naturgas aqqutigalugu aningaasanik isaatitaqalernissamut pisinnaatitaaffeqalerusuppoq. Pisinnaatitaaffeqalerusullutik oqariartortut tassaapput namminersorneq pillugu ataatsimititaliarsuarmi aningaasaqarnermut inuussutissarsiutinillu ineriartortitsinermut suleqatigiissitaq.
Namminersorneq pillugu isumalioqatigiissitami aningaasaqarneq inuusutissarsiutillu ineriartortsinnissaat pillugu suleqatigiissitami isumaqatigiinniarnerit sapaatip akunnerini pingasuni uninngareersullu, Naalakkersuisut siulittaasuata Hans Enoksen-ip folketingimullu ilaasortap Kuupik Kleistip isumaqatigiinniarnerit unittoorsimanerannut pissutaasoq erseqqissarpaat.
Hans Enoksen kiisalu Kuupik Kleist isumaqarput isumaqatigiinniarnerit unittoornerat pissuteqartoq uuliamik nioqqutissiorfiit inuiaqatigiinnit pigineqartut niueqatigiinneq aallaavigalugu ingerlanneqartut peqqutaasut.
Naluneqanngitsutut DONG qallunaat nunaanit pigineqarpoq. DONG-ilu uuliasiorluni Kalaallit Nunaanni Qeqertarsuup kitaani uuliamik nassaassaguni aningaasat sinneqartoorutigineqartut Danmarkip agguangarsiani tigummiinnassagai.
Kalaallit Nunaat nammineerussaminik uuliamik nioqquteqarsinnaasumik peqaleraluarpat, Namminersornersorneq pillugu isumalioqatigiissitap ataani suleqatigiissitami ilaasortat qallunaat isumaqarput Kalaallit Nunaata Danmarkillu aningaasat sinneqartoorutigineqartut akunnerminni avittassagaat. Kisianni Kalaallit Nunaata tamanna akuerisinnaanngikkaa Naalakkersuisut siulittaasuata Hans Enoksen-ip naqissuserpaa.
Kuupik Kleistip oqaatigaa Kalaallit Nunaat uuliamik nioqquteqarsinnaanermut pisinnaatitaafeqalertariaqartoq qallunaat naalagaaffiata aningaasatigut pissarsiaqaatiginngisaanik.
Maannakkut GONG-imik tassa Grønlandsk olie og nutar gas-imik pilersitsinissaq eqqarsaatigineqanngikkallarpoq.
Aningaasarsiorneq inuussutissarsiutinillu ineriartortitsineq pillugu suleqatigiisitap akuerinikuuaa, kalaallit uumaatsunik pisuussutinik tunisaqarnermikkut isertitatik siulliit 75 millioni koruunit nammineq sipporneqarpatali taakku bloktilskudimit peerneqartassasut.
