Uuliasioqatigiiffiit ukiaru qilleriniarput

Uuliasiortitseqatigiiffiup Cairn Energyp Nunatsinni uuliaqarsinnaanera suli neriuutigaa. Tamanna Londonimi Børsenimut ippassaq nalunaarutaani atuarneqarsinnaavoq. Uuliasioqatigiiffiup Cairn Energyp nunatta kitaani qillerisarnini 2014-mi nangissuai. Uuliasioqatigiiffik Baffinip Kangerliumanersuani, suli qilleriffiusimanngitsumi, misiliilluni ukiaru qilleriniarpoq.
Allattoq Elisa Isaksen
maajip 18-at 2012 09:10

Cairn Energyp nalunaarummini kingumut erseqqissarpaa, naak Nunatta eqqaani qillerisarnermini maannamut suli iluatsitsisimanngikkaluarluni, paasissutissat sajuppillatsitsisarnikkut maannamut katersorneqarsimasut tunngavigalugit, Nunatta avataani immap naqqani uuliaqarsinnaanera ilimanaateqartoq.

Sajuppillatsitsisarluni misissuinerit inerneri, ujaasiffissami Pitu-meersut, misissoqqissaarneqarnerat aasaru naammassineqassaaq, Cairn Energyllu tamaani misileraalluni qillerinini 2014-imi nanginniarpai.

Tamatuma saniatigut uuliasiortitseqatigiiffiup, 2012-imi ukiakkut, Baffinip Kangerliumanersuani, suli misiliilluni qilleriffiusimanngitsumi, misiliilluni qulinik qillerinissani naatsorsuutigaa. Tamanna pissaaq uuliasiortitseqatigiit allat soorlu Shell, Statoil aamma Mærsk suleqatigalugit.

Misiliilluni qillerinerit Baffinip Kangerliumanersuani uuliaqarsinnaaneranik pingaarutilimmik paasissutissiinissaat naatsorsuutigineqartoq, Cairn Energy-mit allapput, taamaattorli erseqqissarneqarluni misiliilluni qillerinissat Namminersorlutik Oqartussanit akuerineqaqqaartussaasut.

Cairn Energymit aamma oqaatigineqarpoq, Kujataani ujaasiffigineqartussani, sajuppillatsitsisarluni misissuinerit apriilimi naammassineqartut.

Tamaani misissuinernit paasisat inernerisa ukiamut saqqummiunneqarnissaat naatsorsuutigineqarpoq, tamatumunngalu peqatigitillugu Cairn Energy Kujataani misissueqqissarnissaminut suleqatissarsiortussaassalluni.