Uuliasioqatigiifferujussuit akuersissutinik tunineqarput

Baffinnip Kangerliumarngani gassimik uuliamillu qalluisinnaalernissaq anguniarlugu misissuiniarlutik uuliasioqatigiiffissuit qinnuteqaataat maanna Aatsitassanut Naalakkersuisoqarfiup aamma Naalakkersuisut ullumi akuersissutigaat.

Ulloq qinnuteqarfissaq kingulleq nalliummat uuliasioqatigiiffissuit uku akuersissutinik tunineqarput: Shell, Statoil, ConocoPhillips, Cairn Energy, GDF Suez, Maersk Oil aamma DONG aammalu akuersissummik tunineqartunut ilaavoq Nunaoil A/S.

- Neqeroortitsinerup inernera Kalaallit Nunaanni inuiaqatigiit aningaasaqarneranni piujuartussamik angusaqarnissamut alloriarneruvoq pingaaruteqartoq, Inuussutissarsiornermut aamma Aatsitassanut Naalakkersuisoq, Ove Karl Berthelsen tusagassiortunut nalunaarnermini taama allappoq.

Imartani sumiiffinni pilerigineqarnerusut qinnuteqartunik siunniussaasimasut Naalakkersuisup oqaatigaa. Erseqqissaatigalugulu qinnuteqartut pilersaarutaat saqqummiunneqartut aalajangiinermi isiginiarneqarsimasut ukuusut, tassalu uuliasioqatigiiffissuit aningaasaqarnerat, uuliasiornermi ilisimasaqassusaat aammalu isumannaatsumik uuliaasiorsinnaaneri pingaartinneqarsimasut.

- Taamaattumik piginnaatitsisummik pigisaqartut Kalaallit Nunaanni uuliasiornermi periarfissanik misissuinermi isumannaatsumik naapertuuttumillu peqataanissaat tatigilluinnarpara, Inuussutissarsiornermut Aastitassanullu Naalakersusioq Ove karl Berthelsen oqarpoq nangillunilu,

- Sillimaniarneq pitsaalluinnartariaqarpoq suliaqarnerisalu inernerinik malinnaanissamut qilanaartorujussuuvunga.