Uuliarsuaq seerisoq annertuninngoriaannaavoq
Uulia 800.000 liiteri ulloq unnuarlu suli imaanut seerivoq. Maannalu tassa siunnersuutaasinnaasut amigaatigineqalerput, tassami uuliasiortitseqatigiit qanorpiaq iliussanerlutik ilisimannginnguatsiarmassuk.
Talartiusarsuartut pusingasutut ittoq init quleriiaat sisamat portoqataat putusoornermut militsitsissutissatut inissinneqaraluartoq sermernerminit milittoorpoq, tassa imaq nillerpallaarmat tasamanilu immap qaavaniit 1.500 meterisut ititigisumi naqitsineq annertuallaarmat, taamaalillunilu talartersuaq atorsinnaanani.
Uuliasiortitseqatigiiffiup BP-p uuliamik maqisoornerup nunami imaanilu avatangiisinik ulorianartorsiortitsigaluttuinnartup qanoq iliorluni unitsinneqarsinnaanera maanna eqqarsaatigilerpaa.
Amerikami sinerissamik nakkutilliisut uuliamik mingutsitsineq akiorniarlugu suliniuteqartut pisortaata admiral Pat Allonip Amerikamiut tv-annut ippassaq unnukkut oqaatigaa putu uuliap aniaffia arsaaqqanik golferluni atorneqartartunik immerneqarsinnaassasoq.
- Putup qulaani qillerinermut atortut arsaaqqanik biilillu assakaasuisa qalequtaannik gumminik pilattarneqarsimasunik silaannaap naqitsinera atorlugu immerniarlugu misilinniarpaat, uuliap anianerata unitsinneqarsinnaanera takuniarlugu, admiral Allon CBS-imut oqarpoq.
BP-p aamma talartiusamik minnerusumik putup qulaanut inissinneqartussamik ikkussinissani eqqarsaatigaa, neriuutigalugu taanna talartiusarsuartut annertulli sermerluni milissanngitsoq.
Aammattaaq eqqarsaatigineqarpoq ruujori qillikkamut immap naqqanut suli atasoq kipineqassasoq, ruujorimillu annermik ikkussisoqassasoq, periaaseq taamatut ittoq iluatsinngitsoorpat uuliamik maqisoorneq suli annertunerulissaaq.
BP-p maqisoornermik iluaqusiiniarluni qilligaq alla allartippaa.Tamanna uuliamik aniasumik ajornartorsiummut aaqqiissutaasinnaassaaq. Sapaatit akunnerili arlallit qaangiuppata aatsaat taanna naammassissaaq. taama DR-imit tusagassiipput.
