Uuliarsiorneq milliardip affaanik pissarsissutaavoq
Uuliasiorluni siorna qillerinerit inernerigallagaat neriulluarnarput, tassami Qeqertarsuup Kitaani uuliaqarfeqarsinnaaneranik gasseqarfeqarsinnaaneranillu ilimagisaqarneq uppernarsineqarpoq, Inuussutissarsiornermut aatsitassarsiornermullu Naalakkersuisoq Ove Karl Berthelsen tusagassiutinut ilaatigut allappoq.
Uuliamik gassimillu 2010-mi ujarlerluni qillerisoqarneranut atatillugu inuiaqatigiit aningaasaqarnerannut pissarsissutaasut naatsorsorneqarneqarallarnerat 425 millionit koruunit missaanniippoq.
Pissarsissutaasuni taakkunani suliffeqarfinnit nunatsinni namminersortunit pigineqartunit nioqqutissat kiffartuussissutillu nalingi ilaatinneqarput.
- Naalakkersuisut anguniagaraat Kalaallit Nunaanni uuliasiornermut atatillugu misissuilluni ingerlatanut sulisussat kiffartuussinerillu annertusiartuaartumik nunaqavissunit akisussaaffigineqariartuaalernissaat, tamatumani ilaatigut isumannaallisaanermut piumasaqaatit aamma niuernikkut atugassarititaasut ataqqineqassallutik, naalakkersuisut allapput.
