Uuliarluerneq politiit suli misissorpaat
- Suliamut tunngatillugu apersorneqartussat aallaqqapput, kisianni kikkuuneri ilisimavagut, Ilulissat politiivini ulluinnarni aqutsisoq Karl Vinther oqarpoq.
Ilanngullugu oqaatigaa taakku sapaatip akunnerisa marluk ingerlaneranni apersorneqareernissaat naatsorsuutigalugu.
Ilulissani qaammat kingulleq uuliakoq 5.000 literi anartarfikut imaanut kuuffiatigut inginneqarpoq, imaanilu migutsitsisoqarluni. Uuliakoq takornariartaammeersuuvoq, assartuinermillu suliaqartut uuliakoq anartarfikuusoralugu imaanut kuivaat.
Ilulissani qatserisartut uuliakoorfiusumi sapaatip akunnerata missaani saliipput. Qaasuitsup kommunianiit taarsiivigitinnissamik suli piumasaqartoqanngilaq, tamannali qanittumi pissasoq, Karl Vintherimit ilimagineqarpoq tassami Ilulissani qatserisartut uuliaarluernermik saliineq pillugu naatsorsuusiussapput.
Politiit misissuinerat naammasseriarpat, politimestereqarfimmi inatsisilerituup suliamut nalilersuisinneqassaaq.