Uuliarluerneq: Paatsooqatigiinneq umiarsuaatillit paasiuminaatsippaat

Clipper Adventuremik piginnittoq Niels Erik Lund KNR-mut emailikkut ilisimatitsivoq umiarsuartik siusinnerusukkut uuliakumik Ilulissat Transportimut tunniussisimasoq tamannalu ajornaquteqanngitsumik pisimasoq.

Assartuisut nassuiaapput isumaqarsimagaluarlutik anartarfiit imaat igittussanngorlugit uuliakuuneralu nalusimanerarlugu. - Suusoq nalusimanngitsuugutsigu ingerlassimanavianngikkaluarparput, suliffeqarfiup oqaaseqartitaa ippassaq oqarpoq.

Pisimasoq pillugu Niels Erik Lund erseqqissaavoq Clipper Adventurer anartarfiit imaannik igitsinissamut nammineq saliinermut nammineq atortoqareerami tamanna suliakkiissutigineqarneq ajortoq.

International Shipping Partnerimit isumakulunnartinneqarpoq qanoq ililluni uuliarluerneq pisinnaanersoq. Taamaammat attaveqatigiittarnermi suleriaatsit misissuataarniarpaat assartuisartut allat taamatut nalaataqarnissaat pinngitsoorniarlugu.

International Shipping Partners arlalinnik umiarsuaateqarput issittumi sikuiuitsumilu kujallermi angalasartunik taamaammat avatangiisinut mianersorluinnartuunerarput.