Uuliaqarneranik misissuinerit qaleralinnik paatsiveerusimaartitsisarput
Qaleralik aalisakkat nipip maligaasaanik malussarinnerpaat ilagaat. Immap iluani paatsiveerusimaarluni ingerlaartarpoq. Aalisartut taamaalillutik qassutini pisarineqarujussuarnerannik tamanna kinguneqartarpoq, qalerallilli ikinneralaarsuit ningittakkani kiisiumalersarlutik. Tamanna Norgep uuliasiornermut pisortaqarfiata imaanilu ilisimatusarnermut sullissiveqarfiata annertuumik misissuineranni aalajangiunneqarpoq.
Paasisat inerneri kalaallit isaannit isigalugit pissanganarput, tassami uuliasiulernissami pisussami Kalaallit Nunaata imartaani piffissap ilarujussuani umiarsuit sajuppillatsitsisarluni misissuutit imaaginnalissammata.
Kaj Sünksen Pinngortitaleriffimmi qaleralinnik immikkut ilisimasaliuvoq. Misissuineq naliliivigeqqullugu KNR-ip taanna nalileeqquaa, oqarporlu:
- Aalisarnerup tungaanit isigalugu umiarsuaq sajuppillatsitsisarluni misissuut tikikkaangat soorunami aalisarneq allamut nuutittariaqassagaanni uuminassaaq. Pingaartumik aalisartoq ilaanneeriarluni aalisarfimminit nuuffissaqartanngimmat.
- Uumasorsiuut tungaannit isigalugu sajuppillatsitsisarluni misissuinerit imatorsuaq kinguneqassagunanngillat. Taamaattorli ajuusaarnassaaq aalisakkat suffinermik nalaanni suffisarfimminnit ungavarsimaartinneqassappata. Suffineq ukiumi ataatsimi ajutoorpat tamatumani ukiumi ataatsimi aalisakkat aalisarneqarneqalernissamissut angissuseqalerumaartussat suffiarineqartussaagaluit tamarmik peerunnerannik kinguneqassaaq. Aalisakkalli Kalaallit Nunaata imartaani iluanaarniutigalugu aalisarneqartartut ukiuunerani upernaalluunniit ingerlanerani suffisarnissaat ilimagineqarpoq. Ilisimasakka malillugit 2009-mi sajuppillatsitsisarluni misissuinerit ukiap ingerlanerani pipput, taama Kaj Sünksen oqarpoq.
