Uuliaqanngilaq
Taamaattumik uuliasiortitseqatigiiffiup qilleriffigisani Nuup avataaniittoq Lady Franklin qimappaa.
Mike Watts-ip Cairn Energymeersup oqaatigaa, immap naqqanik sajuppillatsitsisarluni misissuinernit paasissutissat, uuliasiortitseqatigiiffiup qillerinerani tunngavigineqartut, eqqunngitsuusut paasinarsisoq.
Aamma nutaarsiassaq pitsaanngitsoq allanik ilaqakkajuttarpoq. Qillerinerit iluatsinngitsoortut kingunerannik piginneqataassutit nalingat ullaap tungaa 7 procentip missaannik appariarpoq. Bloomberg.com-imit oqaatigineqarpoq, taamaalilluni aktiat nalingat qaammatini 18-ini aatsaat taama appasitsigilersoq - tassa uuliasiortitseqatigiiffiup Nunatsinni qillerinerminik aallartitsinngikkallarneratut naleqalerlutik.
Cairn Energyp ujaasilluni qillerinini 750 kilometerinik avannarpasinnerusumut nuuppaa.
Taamaattorli Cairn Energymi qullersaq Simon Thomson erseqqissaavoq, uuliasiortitseqatigiiffiup Nunatta imartaani uuliamik nassaarnissani suli isumalluarfigigaa.
Uuliamik nassaartoqannginneranik nalunaaruteqartoqarnera, tupaallaatissaanngitsumik Greenpeacemit nuannaarutigineqarpoq.
Greenpeacemi silap pissusaanut tunngasumik suleqataasoq Jon Burgwald nittartakkamini allappoq, Cairn Energyp uuliamik nassaanngitsoornerata kinguneranik, uuliasiortitseqatigiiffiit allat Issittumi uuliamik nassaarnissaminnik neriulluarnersuat minnerulissasoq neriuutigigini.
Tamatuma peqatigisaanik oqaatigaa uuliamik nassaartoqanngikkaluartoq suli aarlerinartoqartoq.
- Cairn Energy Kalallit Nunaanni pinngortitamik ulorianartorsiortitsivoq, tamannali uloriartorsiortitsinerinnaagunarpoq iluatsitsinermik kinguneqanngitsoq, Jon Burgwald nittartakkamini ilaatigut taama allappoq.
