Uuliap nassaarineqartup annertussusaa kingusinnerusumi aatsaat paasineqarsinnaavoq
Cairn Energyp pisortaa nuannaaqisoq ullumi KNR-imiit oqarasuaatikkut oqaloqatigaarput.
- Alloriarnerujussuuvoq, tuniniaanermut inatsiseqarnerlu pillugu pisortaq, Simon Thomson, nunatsinni qillerineq pillugu akisussaasuusoq oqarpoq.
- Nassaanngeriataarnissatsinnut sanilliullugu iluatsitsinerujussuuvoq. Nuannaajallannaqaaq, taama oqarpoq.
Cairn Energymeersut misileraallutik qillerilinnginnerminni nassaarnissaminnut periarfissaq 10%-iinnaaneraraluarpaat.
Ullumi nassaarineqartoq ilumut qallorneqarnissaanut akilersinnaallunilu naammannersoq oqaatigineqarsinnaanngikkallartoq Simon Thomsonip erseqqissarpaa.
Uulia qaarsumi innermik anitsisartup qaarsortaani 400 meterisut issutigisumiittoq nassaarineqarpoq taamaattumiillu uuliamik qalluiniarneq ajornaannerpaajusanngilaq.
- Misileraalluta qillerinerput naammasseqqaartariaqarparput taavalu qanoq iliuseqarnissatsinnut nassaarineqartoq misissoqqaartariaqassallutigu, Simon Thomson oqarpoq.
Tassa piiarneqarnissaanut tunngatillugu maannakkuugallartoq misissorsinnaanngikkallarparsi?
- Piffissaq apeqqutaavoq. Septembarip naanerata tungaanut qillerinissamut akuersissummik peqarpugut, taannalu maanna naangajalerpoq. Tassa misissoqqissaarnissaanut piffissaqanngeriaannaavugut, kisianni siunissami misissorneqarsinnaavoq, Thomson oqarpoq.
Nassaarneq pissutigalugu uuliasiorfiit suli amerlanerusut soqutiginnilernissaat qularinngilaa.
- Tamaani hydrocarbon-imik uuliamik pinngorartitsisumik peqartoq uppernarsivarput. Tamanna nutaarsiassaavoq uuliasiorfiutileqatigiinnut soqutiginarluinnartuusoq. Kalaallit Nunaanniittunut soorunami nuannersuussaaq. Suliarput pillugu Kalaallit Nunaat soqutigineqarnerulissappat nuannarissuarput – uuliasiortut amerlanerulerpata suli pitsaanerulissaaq.