Uuliap aningaasartai avissavagut? imaluunniit....?
Ullumilu ataatsimiilerunik aningaasaqarneq oqallisigineqassaaq, oqallinnermilu paasinarsissaaq Kalaallit Nunaata Danmarkillu apeqqummut tamatumunnga imminnut qanoq ungasitsigisinnaajumaarnerat.
Ataatsimiititaliami siulittaasuusoq folketingimi ilaasortaq Frank Jensen socialdemokratiusoq naalagaaffiup nunatsinnut tapiissutigisartagaasa apparsarneqarnissaat, uuliaqassagaluarpallu aningaasat qanoq agguarneqarnissaat pillugu ilusilersuisimavoq.
Taassumallu suliaa taanna kalaallinit ataatsimiititaliami ilaasortanit aarleqqutigineqalereerpoq. Tassami Frank Jensenip ilusilersugaa naapertorlugu Danmarkip tapiissutai peerneqaatigalutik Danmarki aningaasatigut suli nunarput aqqutigalugu isaatitsiniartussaassaaq.
Frank Jensenilli ilusilersukkani pillugu mikisualuit tapussorlugit ataatsimiinneq pitinnagu oqaaseqarumanngilaq.
- Illuatungeriilluta naapeqatigiinnissarput uani pineqarpoq Frank Jensen oqarpoq.
Aviisi Jyllands-Posten naapertorlugu ilusilersukkami siunniunneqarpoq uuliamik nassaartoqassagaluarpat nunatta Danmarkillu akornganni piffissaq ungasinnerusoq eqqarsaatigalugu aningaasat isertitsissutaasussat aveqqissaarneqassasut.
SF-ikkulli isumaqarput, Kalaallit Nunaata aningaasat nammineq pigisariaqarai, ukiumoortumillu 3 milliardinik tapiissutaasarsimasut atukkatut taarsersugassatullu isigineqartariaqartut, taakkulu taarsersornerat naammassippata aningaasat Kalaallit Nunaata nammineq qanorsuaq atorsinnaalissagai. Partiilli allat sakkortuumik piumavaat, aningaasat pinngitsooratik avinneqartariaqartut.
