Uuliap akitsorneratigut Kalaallit Nunaanni piitsuunerulissapput avammullu niiverneq akitsussaaq
Uuliap Kalaallit Nunaanni akia liiterimut 50 øremik ippassaq akitsorpoq.
”Pisoq aallarniutaannaavoq”-ilisimatooq Chresten Sørensen mianersoqqusivoq:
-50 øremik akitsuinermut pissutaavoq akuiaavinnut aningaasartuutit annertusisimammata, uulialu siunissami suli akitsoqqittussaavoq. KNI-mut atsiornikkut isumaqatigiissuteqarsimaneq Kalaallit Nunaannut iluaqutaasimaqaaq, tassami uuliap akia taamaalilluni appasitsinneqarsinnaasimavoq, kisianni ikummatissamik atuinerup akitsorujussuarnissaa ilimanarpoq, tassa avataaniit niuerneq eqqarsaatigalugu, Chresten Sørensen oqarpoq, nangillunilu:
-Tassa imaappoq, Kalaallit Nunaanni qanorluunniit ilioraluaraanni piitsunngoraluttuinnassapput – tassami avataaniit niuernissinnut akiliinerusalissaasi, assersuutigalugu uuliamik annikitsunnguamik eqqussigussi, soorlu raajanik amerlanerusunik tunniussisalissaasi. Kalaallit Nunaat tamakkerluni piitsuunerulissaaq, soorunalumi oqallisigisariaqassaaq tamanna qanoq ililluni qaangerneqassanersoq. Immaqa suliffissanik pitsaanernik nassaarnikkut tamanna qaangerneqarsinnavoq, naleqqussarnissarlu tassani tikeqqinneqassaaq, tassami innuttaasut nutaanik suliffittaassagunik ilinniaqqittariaqassapput.
-Kisiannimi imaanngila, inuussutissarsiornermut atuinermullu aningaasartuutit qaffannissaat pinngitsoorsinnaanngikkipput? -Ilissimi Kalaallit Nunaanni Aningaasarsiorneq pillugu ministeriunermut Siunnersuisartuniit nalunaarusiami taama allappusi, aperaarput, akivorlu:
-Ilumoorluinnarputit, Tamanna ima isumaqarpoq, innuttaasut tunngaviusumik isertitaat annertusissapput. Inuussutissarsiorneq aamma pisariillisarneqassaaq, soorlu aalisarneq eqqarsaatigalugu, neriuutigineqaannarsinnaavorlu inuussutissat ikummatissallu akiisa qaffannerisa kinguneranik raajat akii aamma qaffassasut. Ilumulli taama pisoqassanersoq suli nalorninarpoq, ilisimatooq Chresten Sørensen naggasiivoq.
Kalaallit Nunaanni Aningaasarsiorneq pillugu ministeriunermut siunnersuisartut siulittaasuata, ilisimatuup, Chresten Sørensen-ip, Peter Damborgimit apersorneqarnera Carla Davidsenip kalaallisuunngortippaa.
Uuliap akiata qaffakkaluttuinnarnera, tamatumalu Kalaallit Nunaannut sunniutissaa pillugu misissuisussanik Naalakkersuisut ullumi pilersitsipput.
