Uuliap akitsornera billitsinik akisunerulertitsissanngilaq

Nunani assigiinngitsuni timmisartuutileqatigiit ilaasuisa orsussamut immikkut tapiissutissaq akilertussanngorpaat, soorlu SAS-imut ilaasussat – maanili Air Greenland suli taamaaliornianngikkallarluni nalunaarpoq.

Akitsuinermut pissutaavoq oliap akoqanngitsup akitsoriasaarnera – ippassaq akit najoqqutarineqartut naapertussagaanni olia nappartamut 60 dollareqarluni – taamalu aatsaat taama akisutigilerluni.

Air Greenlandimi pisortaaneq Flemming Knudsen oqarpoq soorunami maluginiarsimagitsik timmisartuutileqatigiit allat akinik qaffaanerat.

-Uagulli tamanna pilersaarutiginngikkallarparput, Flemming Knudsen radioaviisimut taama oqarpoq.

Taassuma oqarnera naapertorlugu Air Greenlandimit oliap akiata allanngoriartornera malittareqqissaarneqarpoq:

-Ilaasuttali aarleqqutigisariaqanngikkallarpaat billitsit akiisa qaffariataarnissaat, Air Greenlandip pisortaa oqarpoq.