Uuliamut qillerivissuaq ikkarlittoq uuliarujussuarmik usivoq

Puttasuliaq qilleriviusoq ulluni arlalinni annaanniarneqaraluareerluni ikkarlippoq. Puttasuliaq Shell-ip kalittaataata nutaap Aavermik atilimmit kalinneqartilluni pituutarsuaq kaliutaa anorersuarnerani  kittorartoorpoq tissukalerlunilu.

Ajornartorsiutilli tamaanga killeqanngillat, kalittaatip maskiinaa ajoquteqalerpoq tassalu isumalluutaasinnaajunnaarluni. Puttasuliaq tissukaannalermat allatut ajornartumik Amerikamiut sinerissamik nakkutilliisuisa annaassiniartartuisa puttasuliap inuttai timmukaattariaqarsimavaat, puttasuliarlu marlunngormat ullaakkut qeqertaaqqap Sitkalidak-ip avatinnguanut ikkarlippoq.

Ikkarlinneq  Shell-ip aasaq kingulleq uuliasiortilluni ajutoornerisa siullersarinngilaat.

Juulip qaammataani Shell-ip umiarsuaa qilleriviusoq Noble Discoverer aamma aqunneqarsinnaajunnaarmat atorunnaarneqarpoq,   umiarsuup ajutoorfia maanna ikkarliffiusup ungasinngisaani ippoq.

Tamatuma saniatigut uuliasiorfiutileqatigiit Shell Alaskap avannaatungaani Tjuktit imartaani qillerileraluarmata qillerineq maangaannaq unitsinneqartariaqarpoq, sikorsuit avannaanit kujammut tissukartut uloriagineqalermata qilleriunnaartoqarluni.

Aamma tamaani qillerisoqarnerani isumannaallisaanermut atortorissaarutinik misileraasoqartillugu atortorissaarut pingaaruteqarluinnartoq iluarseriagassaajunnaarluni aserorpoq.

Taannali naammanngilaq umiarsuup qilleriviusup Noble Discoverer-ip maskiinaqarfia november-ip qaammataani ikuallattoorpoq, tamatumalu kingunerisaanik isumannaallisaanermut- mingutsitsinissamullu pisortat killigititaat unioqqutinneqarmata umiarsuaq timmukartinneqarpoq.

Uuliasiortitsivup Shell-ip Alaskami ajutoornera kingulleq tusarliunneqarniariartoq avatagiisinik illersuiniaqatigiit Greenpeace eqiiallapput imalu nalunaaruteqarlutik :

- Tassa issittumi uuliasiortoqalernissaa uuliasiorfiutileqatigiit piareersimaffiginngikkaat pisut kingulliit ersarissitiinnarpaat. Ilami uuliasiorfiutileqatigiit Issittumi pinngortitamut taama innimiillisaartigitillugit uuliap piliaanik issittumi pinngortitamut sunnertiaqisumi ajunaarnersuaqarnissaa aanaralaarsuanngortippaa, Greenpeace-mi tusagassiisartoq Jon Burgwald oqarpoq.

- Issittup uuliamik piiaaffigineqarani illersorneqarnissaa pisariaqarpoq, issittumillu illersuineq qallunaat nunanut allanut ministeriata Villy Søvndalip issittumi ministereqatini peqatigalugit maleruagassiortoqarnissaa sulissutigisariaqarpaa, Jon Burgwald, Greenpeace-p tusagassiisartua taama nalunaaruteqarpoq.