Uuliamit isertitsissutaasussat assortuussutaapput

Nunatsinni uuliamik nassaartoqassagaluarpat iluanaarutigineqarumaartussat agguarnissaat qallunaat kalaallillu politikkeriisa akornanni isumaqatigiingissutaavoq, taama aviisi ullormut saqqummersartoq Jyllandsposten allaaserinnippoq. Namminersorneq pillugu ataatsimiititaliarsuarmi suleqatigiissitaq ippassaq Christiansborg-imi ataatsimiippoq, nunatsinnilu uuliamik nassaartoqassagaluarpat isertitsissutaajumaartussat kalaallit qallunaallu akornanni aveqqissaarlugit agguarneqarnissaat siunnersuutigineqarsimavoq. Folketingimut ilaasortaq Kuupik Kleist oqarpoq savalimmiormiut nunamik piginnittussaanermik isumaqatigiissutaannut assingusumik isumaqatigiittoqarnissaa kissaatigineqartoq. SF sinnerlugu folketingimi ilaasortaatitaq Kristen Touborg oqarpoq, Kalaallit Nunaata nammineerluni aningaasat isertitsissutaajumaartussat pisinnaasariaqarai,

uuliamik isertitsissutaajunmaartussat Danmark-ip ataatsimoortumik tapiissutai 3 milliard-it sinnerpatigit. Uagut SF-imiit isumaqarpugut uulia nassaarineqarumaartussaq Kalaallit Nunaata pigigaa. Namminersorneq pillugu ataatsimiititaliarsuup ataani suleqatigiissitaq ullumi Christiansborg-imi ataatsimiissaaq, tassani ilaasortaallutik folketingimi ilaasortat sisamat nunatsiniillu inatsisartuni ilaasortat sisamat.