Uuliamit iluanaarutit aningaasaateqarfimmut
Nunatsinni uuliamik nassaartoqassappat Norgemiut periuserisimasaat malillugu iluanaarutaasut aningaasaateqarfimmut toqqorneqartariaqarput, nunatta namminersulernissaa eqqarsaatigalugu. Folketingimi ilaasortaq IA-meersoq Kuupik Kleist Danmarkimi nutaarsiassaqartitsivinnut taama oqarpoq.
Kuupik Kleist aamma isumaqarpoq Danmarkip nunatsinni aatsitassanik iluanaaruteqarsinnaanermut pisinnaatitaaffii aamma inissipallaneqartariaqartut.
- Tamakku inissitassat suli inissinngitsut uuliamik nassaartoqassappat, nunatsinnut iluaqutaasussamik isumaqatigiissuteqarniarneq ajornarserersimassaaq, Kuupik Kleist avisimi Informationimi taama issuarneqarpoq.
Taama oqaaseqarnini pissutigalugu Kuupik Kleistip Folketingimilu ilaasortat allat akornanni, minnerunngitsumillu nunatta namminersulernissaa pillugu isumalioqatigiissitarsuarmi assortuuttoqalernissaa ilimagineqarsinnaalerpoq, tassami Konservativ-it, Dansk Folkeparti SF-illu isumaqarput, nunatsinni uuliaqassappat naalagaaffiup ukiumoortumik tapiissutai ilanngarterneqartariaqartut.
Uulia pillugu isumaqatigiinnginneq danskit kalaallillu attaveqatigiinnerat pillugu isummertarnermik tunngaveqartoq Kuupik Kleist isumaqarpoq.
- Danskit nunatsinnik aningaasannanniutigiumallugu iluanaarutigiumallugulu nunasiaateqalersimanerat, danskit qinikkat massakkut oqaaseqartarnerisigut ilisarineqarsinnaavoq, tassami isumaqarput uuliaqassappat tamanna Danmarkimut iluanaarutaasariaqartoq, Kuupik Kleist oqarpoq.
Nunatta aningaasatigut nammineernerulernissaa Danmarkip kissaatigiguniuk, taama uuliamik atuisinnaaneq tamaat kalaallinut tunniuttariaqaraa Kuupik Kleist isumaqarpoq.
